ލ.މާވަށުގެ ދެކުނުން 7 ނޯޓިކަލް މޭލު ބޭރުން ދަތުރު ކުރަމުންދިޔަ "ނޫރު-2" ނަމަކަށްކިޔާ ދޯނީގައި އަލިފާން ރޯވެ އަޑިއަށް ގޮސްފިއެވެ.

އެމްއެންޑީއެފުން ބުނީ މި ހާދިސާގެ ރިޕޯޓް އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންއަށް ލިބުނީ މިއަދު ހެނދުނު 07:15 ހާއިރު ކަމަށެވެ.

މިއީ ސަޕްލައި ދޯންޏެއް ކަމަށާއި ދޯނި ދަތުރުކުރަމުން ދިޔައީ ރ. އަތޮޅުން ރޮބިންސަން އައިލެންޑަށް ކަމަށް އެމްއެންޑީއެފުން މަޢުލޫމާތު ދެއެވެ.

"ހާދިސާގެ މަޢުލޫމާތު ލިބުމާ އެކު އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންގެ ސިފައިން އެ ސަރަހައްދަށް ދިޔައިރު ދޯނި ވަނީ އަޑިއަށް ގޮސްފައެވެ." އެމްއެންޑީއެފުން ބުނެފައިވެއެވެ.

އެމްއެންޑީއެފުން ބުނީ އެ ދޯނިން ދަތުރުކުރީ 4 މީހުން ކަމަށެވެ. އެއީ ދިވެއްސަކާއި ތިން ބިދޭސީން ކަމަށް އެމްއެންޑީއެފުން މަޢުލޫމާތު ދީފައިވެއެވެ.

އަދި އެމީހުން ލ.މާވަށުގެ ދެކުނުން 6 ނޯޓިކަލް މޭލު ބޭރުން ކަނޑުމަތިން އެމްއެންޑީއެފްގެ އުޅަނދަށް ފެނިގެން މިހާރު ވަނީ ލ.ގަން ރީޖަނަލް ހޮސްޕިޓަލަށް ގެންގޮސްފައިކަމަށް އެމްއެންޑީއެފުން ވަނީ ބުނެފައެވެ.