މާލޭ ސަރަހައްދުން ގޯއްޗާއި ފްލެޓް ލިބޭ މީހުން ކަނޑައަޅަން ކޮމެޓީއެއް އުފައްދައިފިއެވެ.

މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފަރާސްޓްރަކްޗަރ އިން މިއަދު ބުނީ، ސަރުކާރުގެ ގެދޮރުވެރިން ޕްރޮގްރާމުގެ ދަށުން ހިންގާ "ބިންވެރިޔާ" އަދި "ގެދޮރުވެރިޔާ" ސްކީމަށް ކުރިމަތިލާފައިވާ ފަރާތްތައް އިވެލުއޭޓްކޮށް، ބިމާއި ފްލެޓް ދޭނެ ފަރާތްތައް ކަނޑައެޅުމަށްޓަކައި "ގެދޮރުވެރިންގެ ކޮމިޓީ"ގެ ނަމުގައި ކޮމިޓީއެއް ވަނީ އުފައްދަވާފައި ކަމަށެވެ.

ފަސް މެމްބަރުން ހިމެނޭ މި ކޮމިޓީގެ ފުރަތަމަ ބައްދަލުވުން 21 ފެބްރުއަރީ 2023 ގައި ވަނީ ބާއްވާފައެވެ.

ކޮމިޓީގެ ޗެއަރޕަރސަނަކަށް ކަނޑައަޅުއްވާފައިވަނީ ހައުސިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީނެވެ. ކޯ ޗެއާޕާސަނަކަށް ހަމަޖައްސާފައި ވަނީ ފިނޭންސް މިނިސްޓްރީގެ ސްޓޭޓް މިނިސްޓަރ އަލްއުސްތާޛު އަނަސް އަބްދުއްސައްތާރެވެ.

ކޮމެޓީގައި އިތުރަށް ހިމެނިވަޑައިގަންނަވަނީ މއ. އެރިޒޯނާ މަރިޔަމް ނާޒިމާ އާއި، ހ. ރެޖީނާ ހައުސް އައިޝަތު ރަޝީދާ އާއި، ހއ. އިހަވަންދޫ ނެދުންގެ މުހައްމަދު އާރިފެވެ.

"ބިންވެރިޔާ" އަދި "ގެދޮރުވެރިޔާ" ޕްރޮގްރާމަކީ މާލޭ ސަރަޙައްދުގައި ދިރިއުޅޭ ރައްޔިތުންގެ ބޯހިޔާވަހިކަމުގެ މަައްސަލަ ޙައްލުކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން ފަށްޓަވާފައިވާ ޕްރޮގްރާމެކެވެ. މިއަހަރުގެ ރިޔާސީ ބަޔާން ހުށައަޅުއްވަމުން ރައީސް ވިދާޅުވީ، މާލޭން ގޯތި ހޯދުމަށް 15164 އެޕްލިކޭޝަން ހުށަހަޅާފައިވާ ކަމަށެވެ.

ބޯހިޔާވަހިކަމުގެ މައްސަލައަށް ޙައްލެއް ގެނައުމަށްޓަކާ މާލޭ ރައްޔިތުންނަށް 5000 ގޯތި ދޫކުރުމުގެ މަޝްރޫއެއް ރައީސުލްޖުމްހޫރިއްޔާ ވަނީ އިއުލާންކުރަށްވާފައެވެ. އަދި މިއަހަރުގެ ރިޔާސީ ބަޔާނުގައި ރައީސް ވިދާޅުވީ އެޢަދަދު އިތުރުކޮށްދެއްވާނެ ކަމަށެވެ.