ހއ. ހޯރަފުށީ އެއާޕޯޓުގެ ފަޔަރ ވެހިކަލް ހަލާކުވުމާ ގުޅިގެން އެއާޕޯޓުގެ ދަތުރުތައް މެދުކަނޑާލައިފި އެވެ.

ފަޔަރ ވެހިކަލަށް މައްސަލައެއް ދިމާވުމާ ގުޅިގެން މިއަދު ހެނދުނު ހޯރަފުއްޓަށް ކުރަން ހަމަޖެހިފައިވާ މޯލްޑިވިއަންގެ ދަތުރު ވަނީ ހަނިމާދޫއަށް ޑައިވާޓް ކޮށްފައެވެ. އަދި ޝެޑިއުލް ކޮށްފައިވާ އެހެން ފްލައިޓްތައްވެސް މަޑުޖައްސާލާފައިވާ ކަމަށް މަޢުލޫމާތު ލިބެއެވެ.

ހޯރަފުށީ އެއާޕޯޓަށް ކޮންމެ ހޯމަ ދުވަހާއި ބުރާސްފަތި ދުވަހު މޯލްޑިވިއަންގެ ދަތުރުތައް ބާއްވައެވެ. އޭގެ އިތުރުން މަންތާ އެއާގެ ޗާޓަރު ދަތުރެއް ކޮންމެ ދުވަހަކުވެސް ހޯރަފުއްޓަށް ބާއްވައެވެ. މޯލްޑިވިއަން އިން ބުނީ ފަޔަރ ވެހިކަލަށް މައްސަލައެއް ދިމާވެފައިވާތީ އެކަން މިހާރު މަންތާ އަށްވެސް ޙިއްސާކޮށްފައިވާ ކަމަށެވެ.

ހޯރަފުށީ އެއަރޕޯޓުގެ ފަޔަރ ވެހިކަލް ހަލާކުވިއިރު، އެ ރަށުގައި ފަޔާ ފައިޓަރުން ތަމްރީނު ކުރާނެ ފަޔަރ ސިމިއުލޭޓަރެއް ވަނީ ގާއިމު ކޮށްފައެވެ. ރާއްޖޭގެ ސަރަހައްދީ އެއަރޕޯޓުތަކުގެ ތެރެއިން އެންމެ ފުރަތަމަ ސެޓިފައި ކުރި އެއަރޕޯޓަކީ ހޯރަފުށީގެ އެއަރޕޯޓެވެ.