އެޗްޕީއޭގެ އެންގުމާއި ޚިލާފަށް ރާއްޖޭގެ ރިސޯޓެއްގެ މޫދުގައި ރައީސް އިބްރާހިމް މުހައްމަދު ޞާލިޙާއި، ރައީސް ނަޝީދު މިދިޔަ ބުރާސްފަތި ދުވަހު ތިއްބަވަނިކޮށް ނަގާފައިވާ ފޮޓޯއެއް ކަމަށްބުނެ "ދިޔަރެސް" ނޫހުގައި ޖަހާފައިވާ ފޮޓޯގައި ވަނީ ރައީސް އިބްރާހީމް މުޙައްމަދު ޞާލިޙު ނޫން ކަމުގައި އެމަނިކުފާނުގެ ތަރުޖަމާން އިބްރާހީމް ހޫދު ވިދާޅުވެއްޖެއެވެ.

25 ޖޫންގައި ނަގާފައިވާ ފޮޓޯއެއް ކަމަށް ބުނެ ދިޔަރެސް ނޫހުގައި ފޮޓޯއާއި އެކު ޝާއިޢުކޮށްފައިވާ ޚަބަރުގައިވާ ގޮތުން އެ ފޮޓޯ ނެގި ފަރާތުން ވަނީ އެއީ ރައީސް ޞާލިޙްކަން ކަށަވަރުކޮށް ދީފައެވެ.

އެކަމާ ގުޅިގެން ރައީސް އޮފީހުގެ ތަރުޖަމާން އިބްރާހިމް ހޫދު ވިދާޅުވީ، ފުރަބަންދު ތެރޭގައި ރައީސް ޞާލިޙް މާލެއިން ބޭރަށް ވަޑައިނުގަންނަވާ ކަމަށާއި، ފޮޓޯއިން ފެންނަނީ ރައީސް ޞާލިޙް ނޫން ކަމަށެވެ. އަދި މިއީ ޒިންމާދާރު ނޫސްވެރިކަން ނޫންކަމަށްވެސް ހޫދު ވަނީ ވިދާޅުވެފައެވެ.

"މިއީ ޒިންމާދާރު ނޫސްވެރިކަމެއް ނޫން، މީ ފިތުނަ އުފައްދައިގެން މީހުންގެ އަގުވައްޓާލުން. މީގެ ރަނގަޅުގޮތް ބުނެދިނަސް އެ ނޫހަކުން މި ޚަބަރު ރަނގަޅެއް ނުކުރި." ވަރަށް ހިތްޕުޅުހަމަޖެހިވަޑައި ނުގެން ކުރެއްވި ޓްވީޓުގައި ހޫދު ވިދާޅުވިއެވެ.

That’s not the President. He’s been in Malé the whole time. This isn’t journalism it’s slander. Even when I corrected them dhiyares hasn’t bothered to take this down. https://t.co/WicobtHI9e

— Ibrahim Hood (@MvSpokesperson) June 28, 2020

ދިޔަރެސް ނޫހުން ޢާއްމު ކޮށްފައިވާ ފޮޓޯގައި، ރައީސް ނަޝީދުގެ އިތުރުން، ކެނދިކުޅުދޫ ދާއިރާގެ މެމްބަރު އަޙްމަދު ޢީސާ އާއި، ހެންވޭރު ދެކުނު ދާއިރާގެ މެމްބަރު ހުސައިން ޝަހީމް ކަމަށް ބެލެވޭ ބަޔަކު ފެނެއެވެ. ނަމަވެސް މި ފޮޓޯއާއި ގުޅިގެން އެބޭފުޅުން އެއްވެސް އެއްޗެއް އަދި ވިދާޅުވެފައެއް ނުވެއެވެ. މިއީ ހަގީގަތެއް ކަމެއް ވެސް މިނޫހަކަށް ކަށަވަރު ކުރެވިފައެއް ނުވެއެވެ.