ވެލާނާގޭ ޕާކިންޒޯން ބަންދުކުރީ ޕާކިން ބިލްޑިންގ އެތަނުން ނެގުމަށް ކަމަށް ހައުސިން މިނިސްޓްރީން ހާމަކޮށްފިއެވެ.

ވެލާނާގޭ ކައިރީގައިވާ ޕާކިން ޒޯން ބަންދުކުރުމާއި ގުޅިގެން ބައެއް މުވައްޒަފުން އިއްޔެ ވަނީ އެ ސަރަހައްދުގައި މުޒާހަރާވެސް ކޮށްފައެވެ. މިކަމާއި ގުޅިގެން ފުލުހުން ބުނީ ވެލާނާގެއާއި އިންވެގެން އޮންނަ ސައިކަލް ޕާކިންގ ޒޯން މިވަގުތު ބަންދުކޮށްފައިވަނީ ޕްލޭނިންގ މިނިސްޓްރީގެ އެދުމުގެ މަތިން އެމިނިސްޓްރީގެ ބޭނުމަށް ކަމަށެވެ.

ޕާކިން ޒޯން ބަންދުކުރުމާ ގުޅިގެން ހައުސިންގ މިނިސްޓްރީން ބުނެފައިވަނީ މި ހަފްތާ ކުރީކޮޅުން ފެށިގެން އެމިނިސްޓްރީން ދަނީ އެތަނުގައި ހުންނަ ޕާކިން އިމާރާތް ނެގުމުގެ މަސައްކަތް ކުރަމުން ކަމަށެވެ. އެ މަސައްކަތް ކުރުމަށް އެތަނުގައި ކްރޭނު ބޭއްވުމަށްޓަކައި ޕާކިން ހުސްކޮށްފައިވާކަމަށް ހައުސިން މިނިސްޓްރީން ހާމަކޮށްފައިވެއެވެ.

މަސައްކަތް ނިންމައި، ޕާކިންޒޯނު ހުޅުވޭނެ ދުވަހެއް މިނިސްޓްރީއިން ހާމަކޮށްފައެއްނުވެއެވެ.

މިކަމާ ގުޅިގެން ސިޓީ ކައުންސިލުން ބުނީ ވެލާނާގޭ ކައިރީގައި ހަދާފައިވާ ޕާރކިން ޒޯން ބަންދުކޮށް، އެ ސަރައްހަދުގައި ހުރި އުޅަނދުތައް ޓޯ ކޮށްފައިވަނީ ކައުންސިލްގެ އެންގުމަކަށް ނޫންކަމަށެވެ. އަދި އެ ސަރަހައްދު ބަންދުކޮށްގެން މަސައްކަތް ކުރަމުން ދަނީވެސް މާލެ ސިޓީ ކައުންސިލަށް އެންގުމަކާއި ނުލައި، އަދި ކައުންސިލްގެ އެއްވެސް ކަހަލަ ހުއްދައެއްވެސް ލިބިގެން ނޫންކަމަށް ސިޓީ ކައުންސިލުން ވަނީ ބުނެފައެވެ.

ވެލާނާގެ އިމާރާތަކީ ސަރުކާރުގެ އެންމެ ގިނަ މުވައްޒަފުން މަސައްކަތްކުރާ އެއް އިމާރާތެވެ. އެ އިމާރާތް ކައިރީގައި ޕާކްކުރާނެ ޖާގަ ނެތްކަމަށް ބުނެ އަބަދުވެސް މީހުން ޝަކުވާކުރެއެވެ.