އުޞޫލުގެ ބޭރުން ޒަކާތު ފަންޑުން ޚަރަދުނުކުރަށްވާ ކަމަށް މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ ވިދާޅުވެއްޖެއެވެ.

މިނިސްޓަރ މިމޭރުމުން ވިދާޅުވީ ޒަކާތު ފައިސާއިން ޚަރަދު ކުރުމަށް އިސްލާމް ދީނުގައި ކަނޑައަޅުއްވާފައި ވަނީ އަށް ބަޔަށްކަމަށާއި، ނަމަވެސް އެ އަށް ބައިގައި ނުހިމެނޭ ކަންކަމަށް ޒަކާތު ފަންޑުގެ ޚަރަދުތައް ބަހާފައި ހުންނަކަމުގެ މަޢުލޫމާތު ލިބިފައިވާކަމަށް ވިދާޅުވެ ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު ލިޔުމުން ޖަވާބު ހޯދުމަށް ކުރެއްވި ސުވާލުގެ ޖަވާބުގައެވެ.

ސުވާލުގެ ޖަވާބުގައި މިނިސްޓަރ ވިދާޅުވީ، ޒަކާތުގެ ފައިސާ ބެހުމަށް އަމުރު ކުރައްވާފައިވަނީ އަށް ބަޔަށްކަމަށާއި އޭގެ ބޭރުން އެ ފަންޑުން ފައިސާ ޚަރަދުކޮށްފައި ނުވާނެކަމަށެވެ.

އެގޮތުން ޒަކާތުގެ ފައިސާ ބަހާ އަށް ބަޔަކީ، ފަޤީރުންނާއި، މިސްކީނުންނާއި، އާމިލުންނާއި، މުއައްލިފަތު ގުލޫބުހުމް އަދި ދަރަނިވެރިންނާއި، އިބުނުއްސަބީލުގެ އިތުރުން އަޅުން މިނިވަން ކުރުމަށް ކަމަށް މިނިސްޓަރ ވިދާޅުވިއެވެ. އެހެންކަމުން ސަރުކާރުންވެސް ޒަކާތު ފަންޑު ބޭނުން ކުރަނީ ނިކަމެތިންނަށް އެހީތެރިވުމަށާއި، މުޖުތަމަޢުގައި ޙާލުގައި ޖެހިފައިތިބި މީހުންނަށް އެހީތެރިވުމަށާއި، ކިޔަވައިދިނުމަށާއި، ބޭސްފަރުވާއަށްވެސް ދަނީ އެހީތެރިކަން ފޯރުކޮށްދިނުމަށް ކަމަށް މިނިސްޓަރ މިއަދު ވިދާޅުވިއެވެ.

އަދި އެފަންޑުގައި ހުންނަ ފައިސާ ޚަރަދު ކުރަނީ ވަކި އުޞޫލެއްގެ ދަށުން ޒަކާތު ކޮމިޓީގެ ލަފަޔާއި މަޝްވަރާގެ މަތިންކަމަށްވެސް މިނިސްޓަރ ވިދާޅުވިއެވެ.