މުހިންމު 17 ބިލެއް ކޮމިޓީ މަރުހަލާގައި މަޑުޖެހިފައި ވާކަމަށް މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދު ޖަލްސާގައި ރައީސް ނަޝީދު ވިދާޅުވީ، އެކި ސަބަބުތަކާހުރެ ރައްޔިތުންގެ މަޖިލީހުގެ ކޮމިޓީތަކުގައި މުހިންމު 17 ބިލެއްގެ މަސައްކަތް މަޑުޖެހިފައިވާ ކަމަށެވެ. އެހެންކަމުން އެ ބިލުތައް އަވަހަށް ނިންމައި ދެއްވުމަށް ރައީސް ނަޝީދު މިއަދުވަނީ މަޖިލީހުގެ މެންބަރުންގެ އަރިހުން އެދިވަޑައިގެންފައެވެ.

އެގޮތުން ބައެއް ބިލުތައް ކޮމިޓީ ވަގުތު އިތުރުކޮށްގެން ވެސް ނިންމަން ޖެހޭ ކަމަށް ރައީސް ނަޝީދު ވިދާޅުވިއެވެ. އަދި ސަރުކާރާއިއެކު ވާހަކަ ދައްކައިގެން އަވަސްކުރެވެން ހުރި ބިލުތަކުގެ މަސައްކަތްވެސް ބާރަށް ކުރިއަށް ގެންގޮސް ދެއްވުމަށް ރައީސް ނަޝީދުވަނީ އެދިވަޑައި ގެންފައެވެ.

ބިނާވެށި ޕްލޭން ކުރުމުގެ ބިލާއި، ޝަރުޢީ ދާއިރާގެ ޤާނޫނުތަކަށް އިސްލާހު ގެނައުމުގެ ބިލުތަކާއި، ވިޔަފާރިއާއި ގުޅުންހުރި މުހިންމު ބިލުތަކާއި، އެެއްވެ އުޅުމުގެ ގާނޫނަށް އިސްލާހު ގެނައުމުގެ ބިލު އަވަސް ކުރުމުގެ ބޭނުންތެރިކަމުގެ މައްޗަށް ރައީސް ނަޝީދު މިއަދު އަލިއަޅުވާ ލެއްވިއެވެ.

ރައީސް ނަޝީދު މިއަދު ވިދާޅުވީ ރޯދައިގެ ކުރިން މަސައްކަތްތަކަށް ލުއިކަމެއް ލިބޭނޭ ގޮތަށް މަސައްކަތްތައް ބައްޓަން ކުރެއްވުމަށް ކޮމިޓީތަކުގެ މުޤައްރިރުންގެ އަރިހުން އެދިލައްވާ ކަމަށެވެ.