ކުޑަކުދިންތަކަކަށް ޖިންސީ ގޯނާ ކުރި މައްސަލަގައި ހައްޔަރު ކުރި ފާތިމަތު ރިހުލާ ބަންދުން ދޫކޮށްލައިފިއެވެ.

ޔުނާން އާއި ރިހުލާގެ މައްޗަށް ކޮށްފައިވަނީ އާއިލާގެ ކުޑަފިރިހެން ކުއްޖަކާއިއެކު ގަދަކަމުން ބަދުއަޚްލާޤީ އަމަލު ހިންގި ކަމުގެ ތުހުމަތެވެ. އެ މައްސަލާގައި އެދެމަފިރިން ފުލުހުން ހައްޔަރުކޮށްފައި ވަނީ 2020 ވަނަ އަހަރުގެ ފަހުކޮޅުގައެވެ.

ކުޑަ ކުއްޖަކަށް ޖިންސީ ގޯނާކުރި މައްސަލާގައި ރިހުލާގެ މައްޗަށް ފަސް ދައުވާއެއް އުފުލައި އެމައްސަލަތައް ހުޅުމާލޭ މެޖިސްޓްރޭޓް ކޯޓުގައި މިހާރު ކުރިއަށް އެބަދެއެވެ. އޭނާގެ މައްޗަށް އަދި މިހާތަނަށް ހުކުމެއް އިއްވާފައެއް ނުވެއެވެ. ނަމަވެސް ރިހުލާ އާއި ޔުނާން ބަންދުގައި ތިބީ ޝަރީއަތް ނިމެންދެން އެމީހުން ބަންދުގައި ބައިތިއްބަން ކޯޓުން ކޮށްފައިވާ އަމުރެއްގެ ދަށުންނެވެ.

ރިހުލާ ބަންދުން ދޫކޮށްލާފައިވަނީ ބަލިވެއިނުމުން ކަމަށް މަޢުލޫމާތު ލިބިފައިވެއެވެ. ރިހުލާ ބަންދުން ދޫކޮށްލުމަށް ކޮށްފައިވާ ޝަރުތުތަކުގެ ތެރޭގައި މައްސަލައިގައި ހިމެނޭ ކުޑަކުދިންނާއި، އަދި ހެކިބަސްދޭން ތިބި މީހުންނާއި ބައްދަލު ނުކުރުން ހިމެނެއެވެ.

ރިހުލާގެ މައްޗަށް ކޮށްފައިވާ ފަސް ދައުވާއަކީ ކުޑަކުއްޖަކު އިތުބާރު ކުރަން ޖެހޭ މަގާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ އަމަލެއް ހިންގުމާއި، އެ ކުއްޖާގެ ހާޒިރުގައި އެ ކުއްޖާއަށް ދެއްކުމުގެ މަގްސަދުގައި ޖިންސީ އަމަލެއް ހިންގުމުގެ ދެ ދައުވާއަކާއި، އޮރިޔާންކާޑު ގެންގުޅުމާއި، އޮރިޔާން ކާޑު އުފެއްދުމުގެ ދައުވާ އެވެ.

ކުޑަކުއްޖަކު އިތުބާރު ކުރަން ޖެހޭ މަގާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ އަމަލެއް ހިންގުމުގެ ދައުވާ ސާބިތުވެއްޖެނަމަ ރިހުލާގެ މައްޗަށް 20 އަހަރާއި 25 އަހަރާއި ދެމެދުގެ ޖަލު ހުކުމެއް އަންނާނެއެވެ. ކުޑަކުއްޖަކު އިތުބާރު ކުރަން ޖެހޭ މަގާމެއްގައި ހުރި މީހަކު، އެ ކުޑަކުއްޖަކާއެކު ޖިންސީ އަމަލެއް ހިންގުމާއި އެފަދަ މަންޒަރެއް ދެއްކުމުގެ ކުށް ސާބިތުވެއްޖެނަމަ 15 އަހަރާއި 18 އަހަރާއި ދެމެދުގެ ޖަލުގެ ހުކުމެއް ރިހުލާގެ މައްޗަށް އަންނާނެއެވެ.

ރިހުލާއަށް ކޮށްފައިވާ ހުރިހާ ދައުވާއެއް ސާބިތުވެއްޖެނަމަ އެންމެ މަދުވެގެން އޭނާގެ މައްޗަށް 50 އަހަރު އަދި ގިނަވެގެން 61 އަހަރުގެ ޖަލު ހުކުމެއް އަންނާނެ ކަމަށް ބެލެވެއެވެ.

މި ދަޢުވާތަކަށް ރިހުލާވަނީ އިންކާރު ކޮށްފައެވެ.