ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް، ޗައިނާގެ ރައީސް ޝީ ޖިންޕިންއަށް މަރުހަބާ ދަންނަވައިފިއެވެ.

ރާއްޖޭގައި ހުންނަ ޗައިނާ އެމްބަސީން މިއަދު ބުނެފައިވަނީ ޗައިނާގެ ރައީސްކަމުގެ މަގާމަށް ތިންވަނަ ދައުރަކަށް ހޮވިވަޑައިގެންނެވި ރައީސް ޝީ ޖިންޕިންއަށް ރައީސް ޞާލިޙް މަރުޙަބާ ދަންނަވާފައިވަނީ އިއްޔެ ފޮނުއްވި ތަހުނިޔާގެ މެސެޖެއްގައި ކަމަށެވެ.

ރައީސް ޞާލިހްގެ މެސެޖުގައި ދެ ގައުމުގެ ދެމެދުގައި އޮތް ގާތް ރަހުމަތްތެރި ގުޅުން އިތުރަށް ވަރުގަަދަ ކުރެއްވުމަށް އެދިވަޑައިގަންނަވާކަމަށް ވަނީ ވިދާޅުވެފައެވެ. ހަމައެއާއެކު، ރައީސް ޝީގެ ޒަޢާމަތާމެދު ޗައިނާގެ ރައްޔިތުންގެ މެދުގައި އޮތް އިތުބާރަށާއި، އެ ގައުމަށް އިތުރު ކުރިއެރުމާއި ކާމިޔާބަށްވެސް ރައީސް ޞާލިޙްވަނީ އެދިވަޑައިގެންފައެވެ.

President Solih wishes President Xi every success in honoring the confidence that🇨🇳people continue to have in his leadership &vision. President Solih reflects on🇲🇻🇨🇳solid development partnership, conveying his wishes to work together to deepen the bonds of friendship&cooperation.

— Embassy of China in Maldives (@ChinaEmbassy_MV) March 11, 2023

ދެެހާސް ބާރަ ވަނަ އަހަރު ޗައިނާގެ ވެރިކަމާ ހަވާލުވެވަޑައިގަތް ރައީސް ޝީއަށް ތިންވަނަ ދައުރެއް ދީފައި ވަނީ، އެ ގައުމުގައި ރައީސްކަން ކުރެވޭނީ ދެ ދައުރަށް ކަމަށް ބުނާ ގާނޫނަށް 2018ވަނަ އަހަރު ބަދަލު ގެނައުމަށް ފަހުގައެވެ.

ޗައިނާގެ ނޭޝަނަލް ޕީޕަލްސް ކޮންގްރެސް (އެންޕީސީ)ގައި އެ ގައުމުގެ ރައީސް ކަމަށާއި އެ ގައުމުގެ ސެންޓްރަލް މިލިޓަރީ ކޮމިޝަން (ސީއެމްސީ)ގެ ޗެއާމަން ކަމަށް ޝީ އިންތިޚާބުކޮށްފައި ވަނީ އެންޕީސީގައި ތިއްބަވާ ތިންހާހެއްހާ މެމްބަރުން އިއްތިފާގުންނެވެ.