ރައްޔިތުންގެ މަޖިލީހުގެ ޖަލްސާއެއްގައި މަޖިލީހުގެ އަންހެން ސެކިއުރިޓީން ލައްވައި ފިރިހެން މެންބަރުން ތަޅުމުން ނުނެރެވޭ ގޮތަށް މަޖިލީހުގެ ޤަވާއިދަށް ހުށައެޅި އިޞްލާހް ބަލައިގަނެ ކޮމިޓީއަށް ފޮނުވައިފިއެވެ.

ރައްޔިތުންގެ މަޖިލިސް މިއަހަރަށް ހުޅުވުމަށް ބޭއްވި ޖަލްސާގައި ރައީސުލްޖުމްހޫރިއްޔާ ރިޔާސީ ބަޔާން އިއްވެވުމަށް ހުރަސްއެޅުއްވި ފިރިހެން މެމްބަރުންގެ ނަން މަޖިލީހުގެ ރިޔާސަތުން އިއްވެވުމުން އެ މެންބަރުން ތަޅުމުން ބޭރަށް ނެރުމަށް މަޖިލީހުގެ އަންހެން ސެކިއުރިޓީން ވަނީ ޙަރަކާތްތެރިވެފައެވެ.

އެކަމާގުޅިގެން އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވަނީ، އަންހެން ސެކިއުރިޓީންނަށް ފުރައްސާރަކުރަމުންދާތީ ކަންބޮޑުވުން ފާޅުކުރަށްވާފައެވެ. އަދި މިއީ އެފަދަ ދާއިރާތަކަށް އަންހެނުން ނިކުތުމަށް ދިމާވާ ގޮންޖެހުމެއްގެ ގޮތުގައި ރޮޒައިނާ ސިފަކުރެއްވިއެވެ.

އެކަން ޙައްލު ކުރެއްވުމަށް މަޖިލީހުގެ ޤަވާއިދަށް ރޮޒައިނާ ހުށައެޅުއްވި އިސްލާޙުގައި ވަނީ މަޖިލީހުގެ ފިރިހެން މެންބަރުން ތަޅުމުން ނެރުމަށް ޙަރަކާތްތެރިވާނީ ފިރިހެން ސެކިއުރިޓީން ކަމަށާއި، އަންހެން މެންބަރުން ތަޅުމުން ނެރުމަށް ޙަރަކާތްތެރިވާނީ އަންހެން ސެކިއުރިޓީން ކަމަށެވެ.

ރޮޒައިނާ ވިދާޅުވީ، މަޖިލީހުގައި ވެސް ކަންކަން ކުރަންވާނީ މުޖްތަމައު ބަލައިގަންނަ، އަދި އެހެން މުއައްސަސާތަކުން ވެސް އަމަލުކުރާ އަދި މަޖިލީހުންވެސް މީގެ ކުރިން އަމަލު ކޮއްފައިވާ އާންމު މިންގަނޑުތަކާ އެއްގޮތަށް ކަމަށެވެ.

ރޮޒައިން ހުށަހެޅުއްވި އިސްލާހު މަޖިލީހުން ބަލައިގެންފައިވަނީ 44 މެންބަރުންގެ ވޯޓުންނެވެ. ވަކިކޮޅަކަށް ވޯޓު ނުދެއްވާ ދެ މެންބަރަކު ތިއްބެވިއެވެ. މި އިސްލާހް މަޖިލީހަށް ބަލައިގަތުމުން ދިރާސާކުރުމަށް އާންމު ކޮމިޓީއަށް ވަނީ ފޮނުވާފައެވެ.