ރައްޔިތުންގެ އާމްދަނީގެ މިންވަރު މައްޗަށްދާނީ އިގްތިސާދީ ހަރަކާތްތައް އިތުރުކޮށްގެން ކަމަށް މާލީ ވަޒީރު އިބްރާހިމް އަމީރު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުންގެ ސުވާލުތަކަށް ޖަވާބު ދެއްވަމުން އަމީރު ވިދާޅުވީ، މުސާރަތައް ބޮޑުކުރުމަކީ އިންފްލޭޝަނަށް އޮތް ޙައްލުނޫން ކަމަށާއި، އޭގެ ބަދަލުގައި އެއީ އިންފްލޭޝަން މައްޗަށްދާ މައިގަނޑު އެއް ސަބަބު ކަމަށެވެ.

"އަޅުގަނޑުމެން އިންފްލޭޝަން މަތިވާ މިންވަރަކުން މުސާރަ އިތުރުކުރުމަކީ އެންމެ ރަނގަޅުގޮތެއް ނޫން. ޑިމާންޑް-ޕުލް އިންފްލޭޝަނަކަށް އަންނާނީ. މުސާރަތަށް ބޮޑުވާވަރަކަށް ޕަރޗޭޒިން-ޕަވަރ ބޮޑުވާނެ. އޭރުން އޭގެ ޑިމާންޑް އިތުރަށް ކްރިއޭޓްވާނީ." އަމީރު މިއަދު ވިދާޅުވިއެވެ.

އަމީރު ވިދާޅުވީ ދިވެހިރާއްޖޭގެ އިގްތިސާދީ ހަރަކާތްތައް އިތުރުކޮށްގެން ނޫން ގޮތަކަށް ރައްޔިތުންނަށާއި ވިޔަފާރިތަކަށް ލިބޭ ޢާމްދަނީ އިތުރުވެގެން ނުދާނެ ކަމަށެވެ. ދިވެހިރާއްޖޭގެ އިގްތިސާދު ފުޅާ ކުރުމަށް ސަރުކާރުންދަނީ ގިނަ މަސައްކަތްތަކެއް ކުރަމުންކަން ފާހަގަކުރަށްވަމުން އަމީރު ވިދާޅުވީ އިގްތިސާދީ ހަރާކަތްތައް އިތުރުވެގެންދިއުމާއި ރައްޔިތުންނަށް ލިބިގެންދާ މަންފާތައް އިތުރުވެގެންދިއުމާއި ގުޅިފައިވާކަމަށެވެ.

އެހެންކަމުން ސަރުކާރުން ދަނީ ރާއްޖޭގެ އެކި ސަރަހައްދުތަކުގައި ބަނދަރު އެޅުމާއި އެއަރޕޯޓު ބިނާ ކުރުންފަދަ އިންފްރާސްޓަކްޗަރގެ ގިނަ މަސައްކަތްތަކެއް ހިންގަމުންކަމަށް އަމީރު މިއަދު ވިދާޅުވިއެވެ.