ރައީސުލްޖުމްހޫރިއްޔާގެ މޮޓޯކޭޑް ދަތުރުކުރަށްވާ ރޫޓު ކަނޑައެޅުމަކީ ދިފާއީ ވަޒީރު ކުރަށްވާ ކަމެއްނޫން ކަމަށް ދިފާޢީ ވަޒީރު މާރިޔާ އަޙްމަދު ދީދީ މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މާވަށު ދާއިރާގެ މެމްބަރު މުހައްމަދު ސައީދު ކުރެއްވި ސުވާލަށް ޖަވާބު ދެއްވަމުން މިނިސްޓަރ މާރިޔާ ވިދާޅުވީ ރައީސުލްޖުމްހޫރިއްޔާގެ މޮޓޯކޭޑް ދަތުރުކުރައްވާ ރޫޓު ކަނޑައެޅުމަކީ ދިފާޢީ ވަޒީރުގެ ވަޒީފާގެ މަސްއޫލިއްޔަތުގެ ތެރޭގައި ހިމެނޭ ކަމެއް ނޫންކަމަށެވެ. އިދިކޮޅު ޕީޕީއެމް،ޕީއެންސީން މިއަހަރުގެ މާރޗް މަހުގެ 20 ވަނަ ދުވަހުގެ ރޭ މާލޭގައި ކުރި މުޒާހަރާގައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިޙުގެ މޮޓޯކޭޑަށް ވަނީ ހުރަސް އަޅާފައެވެ.

އެކަމާ ގުޅިގެން މިނިސްޓަރ މާރިޔާ މިއަދު ވިދާޅުވީ، މޮޓޯކޭޑާއި ގުޅިގެން ހިނގައިދިޔަ ކަންތައް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމެޓީން ދަނީ ބަލަމުން ކަމަށެވެ. އަދި އެއީ އެކަމަނާގެ ޒިންމާތަކާއި މަސްއޫލިއްޔަތުތަކުގެ ތެރޭގައި ހިމެނޭ ކަމެއް ނޫންކަމަށް މިނިސްޓަރ ވިދާޅުވިއެވެ.

"އަޅުގަނޑުގެ ރަސްމީ ޒިންމާގައި ހިމެނޭ ކަންތައްތައް ދަންނަވައިފިން. ރައީސުލްޖުމްހޫރިއްޔާ ވަޑައިގަންނަވާނޭ ރޫޓު ނިންމުމަކީ ދިފާއީ ވަޒީރު ކުރާކަމެއްނޫން." މިނިސްޓަރ މާރިޔާ ވިދާޅުވިއެވެ.

ރައީސް އިބްރާހިމް މުހައްމަދު ޞާލިޙްގެ މޮޓޯކޭޑަށް ހުރަސް އަޅާފައިވަނީ ބޮޑުތަކުރުފާނު މަގުން ޕީޕީއެމް އޮފީސް ދޮރުމަތިން ދަތުރު ކުރަށްވަމުން ގެންދަވަނިކޮށެވެ. ރައީސްގެ މޮޓޯކޭޑް ބޮޑުތަކުރުފާނު މަގުން ދަތުރުކޮށްފައިވަނީ ހުޅުމާލޭގައި ބޭއްވި ރެހެންދި އެވޯޑު ހަފުލާގައި އެމަނިކުފާނު ބައިވެރިވެވަޑައިގަތުމަށް ފަހު އެނބުރި ވަޑައިގެންނެވުމުގެ މަގުމަތީގައެވެ.

އެމައްސަލާގައި ފުލުހުން 5 މީހަކު ހައްޔަރުކުރިއެވެ.