އަލްސަފާ ހައްޖު އެންޑް އުމްރާ ގުރޫޕުން މި ރޯދަމަހު އުމްރާއަށް ދާން ހަމަޖެހުނު މީހުންނަށް ނުފުރުނު މައްސަލަ އިސްލާމިކް މިނިސްޓްރީން ބަލަން ފަށައިފިއެވެ.

އިސްލާމިކް މިނިސްޓްރީން ބުނީ، ސަފާ ގުރޫޕުން އުމްރާއަށް ގެންދިއުމަށް ހަމަޖެހިފައިވާ މީހުން، އުމްރާއަށް ނުފުރޭ ކަމުގެ ޝަކުވާ މިއަދު މިނިސްޓްރީއަށް ލިބިފައިވާ ކަމަށެވެ. އެކަމާ ގުޅިގެން އެކަން ހިނގާފައިވާ ގޮތް ވަރަށް ގާތުން ބަލަމުންދާ ކަމަށް އިސްލާމިކް މިނިސްޓްރީން ވަނީ ބުނެފައެވެ.

މަޢުލޫމާތު ލިބިފައިވާ ގޮތުގައި ސަފާ ގުރޫޕުގެ ހަވާލުގައި އުމްރާއަށް ދާން ތިބި އުމްރާވެރީން ފުރުމަށް ހަމަޖެހިފައި އޮތީ މިއަދުއެވެ. ނަމަވެސް އެ މީހުންނަށް ވިސާ ހަމަޖެހިފައިނުވުމުގެ ސަބަބުން ނުފުރޭނެކަން ފަތިހު ވަނީ އަންގާފައެވެ.

ރަމަޟާން މަހުގެ އުމްރާއަށް އެ ކުންފުނީގެ ޙަވާލުގައި 181 މީހުން ސައުދީ އެއާލައިންގައި މިއަދު ފުރުމަށް އޮތީ ހަމަޖެހިފައެވެ. އެގޮތުން އުމްރާވެރިންގެ ލަގެޖުތައް ގެންގޮސް، އެއާޕޯޓަށް ދާންޖެހޭ ގަޑިވެސް އެގްރޫޕްގެ ވައިބަރ ގްރޫޕްގައި ވަނީ އަންގާފައެވެ.

"މިއަދުގެ މިވަގުތާ ހަމައަށް ސައުދީން އުމްރާ ވިސާ ދޫކުރާ ކުންފުނިން މި ގްރޫޕަށް އެއްވެސް ވިސާއެއް ދޫކޮށްފައި ނުވާތީ ފުރެން ނެތް ވާހަކަ ހިތާމައާއެކު ދަންނަވަމެވެ." ވައިބަރ ގްރޫޕްގައި ލިޔެފައިވެއެވެ.

އެކުންފުނިން ބުނީ މިއަހަރުގެ ރަމަޟާން ޢުމްރާގެ އަޅުކަމަށް ދެވޭނެ ކަމުގެ ޔަޤީންކަން ނެތް ކަމަށާއި، މިއަހަރުގެ ދަތުރު އަންނަ އަހަރަށް ފަސްކުރަން ޖެހިދާނެކަމަށެވެ.

މި އަހަރުގެ ރަމަޟާން އުމްރާއަށް އަލް ސަފާ ކުންފުނިން ބޮލަކަށް 37،500ރ. ނެގި އެވެ.