ނޫސްވެރިއަކަށް އިންޒާރު ދިން މައްސަލައިގައި ފުރިހަމަ ތަހުގީގެއް ހިންގުމަށް ސަރުކާރަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފިއެވެ.

މި މައްސަލަ މަޖިލީހަށް ހުށައެޅުއްވީ ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު ޢަލީ އާޒިމެވެ.

އާޒިމްގެ ކުއްލި މައްސަލާގައި ބުނެފައިވަނީ ރާއްޖޭގެ އޮންލައިން މީޑިއާއެއްގެ ނޫސްވެރިންތަކަކަށް މަރުގެ އިންޒާރު ދީފައިވާއިރު، މީގެ ކުރިން ވެސް ނޫސްވެރިންނަށް ދީފައިވާ މަރުގެ އިންޒާރުތަކާއި ހަމަލާތަކުގެ ފުރިހަމަ ތަހުގީގެއްކޮށް އިންސާފު ގާއިމްކޮށްދެވިފައި ނުވާކަމަށެވެ.

ހަމައެއާއެކު ނޫސްވެރިންނަށް މިގޮތަށްދޭ އިންޒާރުތަކާމެދު ފިޔަވަޅު ނޭޅޭނަމަ އެކަމުގެ ސަބަބުން ނޫސްވެރިންނަށް ރައްކާތެރިކަމެއް ނުލިބި ނޫސްވެރިކަމުގެ މިނިވަންކަން ގެއްލިދާނެ ކަމަށް އާޒިމް ވިދާޅުވިއެވެ. އެހެންކަމުން ނޫސްވެރިންނަށް ދޭ މިފަދަ މަރުގެ އިންޒާރުތަކުގެ މައްސަލަތަކާމެދު ސަރުކާރުގެ ތަހުގީގީ އިދާރާތަކުން ފުރިހަމައަށް ސަމާލުކަންދީ އަވަސް ފިޔަަވަޅު އެޅުމަށް އާޒިމްގެ މައްސަލާގައި ގޮވާލައްވާފައިވެއެވެ.

މިމައްސަލަ މަޖިލީހަށް ބަލައިގަތީ ވޯޓުގައި ބައިވެރިވެވަޑައިގެންނެވި 18 މެންބަރުންގެ ވޯޓުންނެވެ.

ރާއްޖޭގެ އޮންލައިން މީޑިއާއެއް ކަމަށްވާ ދައުރު ނޫހުގެ ނޫސްވެެރިޔާ އަހުމަދު ނާއިފަށް އިންޒާރު ދިން މައްސަލާގައި މޯލްޑިވްސް ޖާނަލިސްޓް އެސޯސިއޭޝަނުން ނެރުނު ނޫސްބަޔާނެއްގައި ވަނީ ހިލްޓަން މައްސަލައިގެ ރިޕޯޓާ ގުޅޭ ގޮތުން އެ ނޫހުގެ އެޑިޓަރަކަށް ގުޅައި އެ ރިޕޯޓް ނަގަން މައްސަލައިގެ މަސްލަޙަތުއޮތް ފަރާތަކުން އިންޒާރު ކުރެއްވި ކަމަށެވެ.

އަދި އޭގެ ފަހުން އެ ނޫސްވެރިޔާއަށް ވަނީ އިންޒާރުގެ މެސެޖުތަކެއް ލިބިފައެވެ. ނާއިފާއި ނޫހުގެ ސީނިއާ އެޑިޓަރަށް ފޮނުވި މެސެޖުގައި އެ ދެމީހުންނާ "މަގުމަތިން ދިމާކޮށްލާނެ" ކަމަށް ބުނެފައި ވެއެވެ. މި މައްސަލަ މިހާރު ވަނީ ފުލުހުންނަށް ހުށަހަޅާފަ އެވެ.