ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް 2021 ވަނައަހަރުގެ މެއި މަހުގެ ހަވަނަ ދުވަހުގެ ރޭ އައިއީޑީއެއް ގޮއްވާލައިގެން ދިން ޓެރަރިސްޓް ޙަމަލާގެ ހުކުމް އަންނަ އޮގަސްޓު މަހުގެ 31 ވަނަ ދުވަހު ކުރާ ގޮތަށް، މައްސަލައިގެ ތާވަލް އެކުލަވާލައިފިއެވެ.

މެއި 6 ވަނަ ދުވަހުގެ ރޭ 8:32 ގައި ނީލޯފަރުހިނގުމާއި މަޖީދީމަގާ ގުޅުނު ކަންމަތިން، ސައިކަލެއްގައި އިންޕްރޮވައިޒްޑް އެކްސްޕްލޯސިވް ޑިވައިސް (އައިއީޑީ) އެއް ހަރުކޮށްގެން ރައީސްް ނަޝީދު އަވަހާރަކޮށްލުމަށް އެ އައިއީޑީ ގޮއްވާލުމުގެ ސަބަބުން ރައީސް ނަޝީދުގެ ހަށިކޮޅަށް ބޮޑެތި އަނިޔާތަކެއްލިބި ބޭސް ފަރުވާއަށް ރާއްޖޭން ބޭރުގައި ގިނަދުވަސްތަކެއް ވަންދެން އެމަނިކުފާނު އުޅުއްވާފައިވެއެވެ.

ޓެރަރިޒަމްގެ މި މައްސަލާގައި ދަޢުލަތުން ދައުވާ ކޮށްފައިވަނީ ގއ. ކޮނޑޭ ފޮޅޭމާ ތަހުމީން އަހުމަދާއި، މއ. ފޭރުގޭ މުޖާޒް އަހުމަދާއި، ނ. މަނަދޫ ނޫރީގޭ އަލީ ހައިޝަމާއި، ގއ. ވިލިނގިލީ ހުދުރުވާގޭ ފަހުމީ އަލީއާއި، މ. ކުދެހިގޭ އިސްހާގު އަދި އއ. މާޅޮސް، އަސަރީގޭ މުހައްމަދު ނާޒިމްގެ މައްޗަށެވެ.

ގާތްގަނޑަކަށް އަށް މަހެއްހާ ދުވަހުގެ މެދުކެނޑުމަކަށްފަހު މިއަދު ބޭއްވި އަޑުއެހުމުގައި އޮތީ ދެފަރާތުން އިފްތިތާހީ ބަޔާން ހުށަހެޅުމެވެ. އެގޮތުން ދަޢުލަތުން އިފްތިތާޙީ ބަޔާން ހުށައަޅަމުން ބުނެފައިވަނީ ދަޢުވާ ލިބޭ ފަރާތްތަކުން ރައީސް ނަޝީދުގެ ލޭ ހުއްދަކޮށް ހަމަލާ ދޭން ދުރާލާ މަޝްވަރާތައް ކޮށްފައިވާކަމަށާއި، މި މަޝްވަރާތަކުގައި އިސްކޮށް އުޅުނީ ތަހުމީނު ކަމަށެވެ. އެގޮތުން ސައިކަލުގައި ތިން ދުވަސް ކުރިން އައިއީޑީ ހަރުކުރި ކަމަށާއި، އައިއީޑީން ތަހުމީނާއި ހައިޝަމްގެ ޑީއެންއޭ ފެނުނު ކަމަށް ދަޢުލަތުން ވަނީ ބުނެފައެވެ.

ދަޢުލަތުންބުނީ، ނީލޯފަރުގޯޅި ކަންމަތީ ސައިކަލު ޕާކުކުރީ އިސްހާގު ކަމަށާއި، އައިއީޑީ ގޮއްވާލި އަދުހަމް އަތަށް ރިމޯޓު ދިނީ ނާޒިމް ކަމަށެވެ. އޭގެއިތުރުން ހަމަލާއަށްފަހު އަދުހަމް ފިލުވީ މުޖާޒު ކަމަށާއި ހަމަލާގެ އެކި ކަންކަމުގައި މީހުން ދަތުރުކުރީ ފަހުމީ ދުއްވާ ޓެކްސީގައި ކަމަށް އިފްތިތާޙީ ބަޔާން އިއްވަމުން ދަޢުލަތުންބުނެފައިވެއެވެ.

ދަޢުލަތުން އިފްތިތާޙީބަޔާން އިއްވާނިމުމުން މައްސަލަ ރައްދުވާ ފަރާތްތަކުން ބުނެފައިވަނީ ދައުވާއަށް އިންކާރު ކުރާކަމަށެވެ. އަދި އެދަޢުވާތައް ދަޢުލަތަށް ސާބިތުކޮށް ނުދެވޭނެކަމަށް ދަޢުވާލިބޭ ފަރާތްތަކުން ބުނެފައިވެއެވެ.

އެއަށްފަހު މައްސަލަ ބައްލަވާ ޤާޟީ ޞަފްވަތު ޙަބީބު މިއަދު ވަނީ މައްސަލައިގެ ތާވަލް ޙިއްސާކުރަށްވާފައެވެ. އެގޮތުން ތާވަލާ އެއްގޮތަށް ކުރިއަށްދާނަމަ 31 އޯގަސްޓު 2023 ގައި މައްސަލައިގެ ޙުކުމް ކުރެވޭނެކަމަށް ލަފާ ކުރަށްވާ ކަމަށް ގާޟީ ވިދާޅުވިއެވެ.

ކްރިމިނަލް ކޯޓުން މީގެކުރިން ވަނީ މެއި 6 ގެ އައިއީޑީ ގޮއްވާލި އަދުހަމަށް 23 އަހަރާއި 6 މަހާއި ނުވަ ދުވަހުގެ ޖަލު ޙުކުމެއް އިއްވާފައެވެ.

ރައީސް ނަޝީދަށް އަމާޒުކޮށް ގޮއްވާލި އިމްޕްރޮވައިޒްޑް އެކްސްޕްލޯސިވް ޑިވައިސް (އައިއީޑީ) އަކީ ސަލްޓަންޕާކްގައި 2007 ވަނަ އަހަރު ގޮއްވާލި އައިއީޑީ އަށްވުރެ އެތައްގުނަ ބާރުގަދަ އައިއީޑީއެއް ކަމަށާއި މިއީ މިހާތަނަށް ރާއްޖޭގައި ގޮއްވާލި އެންމެ ބާރުގަދަ އައިއީޑީ ކަމަށް ޗީފް އޮފް ޑިފެންސް ފޯމް މޭޖަރ ޖެނެރަލް ޢަބްދުﷲ ޝަމާލް ވަނީ ވިދާޅުވެފައެވެ.