ބޮޑުތަކުރުފާނު މަގުގެ 32 ތަނެއް މަރާމާތު ކުރުމުގެ މަސައްކަތް ޗައިނާ ކުންފުންޏަކާ ޙަވާލުކުރީ 1.4 މިލިއަން ރުފިޔާއަށް ކަމަށް މާލޭ ސިޓީ ކައުންސިލުން ހާމަކޮށްފިއެވެ.

ޗައިނާގެ ހުނާން އިންޖިނިއަރިންގް ކޯޕަރޭޝަން ލިމިޓެޑުން ބޮޑުތަކުރުފާނު މަގުގެ މަރާމާތުގެ މަސައްކަތަށް ބޭނުންވާ ތަކެތި ގެނެސް، މަސައްކަތުގެ އަމަލީ މަސައްކަތް ފަށާފައި ވަނީ މިދިޔަ ހުކުރު ދުވަހުއެވެ.

ސިޓީ ކައުންސިލުން ބުނީ، ބޮޑުތަކުރުފާނު މަގުގެ މަރާމާތުގެ މަސައްކަތް ނިންމުމަށް 30 ދުވަހުގެ މުއްދަތެއް ދީފައިވާނެކަމަށާއި، އެހެންނަމަވެސް ކުރިއަށް އޮތް 10 ވަރަކަށް ދުވަހުގެ ތެރޭގައި މަސައްކަތް ނިންމާލެވޭނެ ކަމަށެވެ.

ގިނަ އަހަރުތަކެއް ވަންދެން އަޅާ ނުލައި ދޫކޮށްލާފައި އޮތުމުން ބޮޑުތަކުރުފާނުމަގުގައި ތާރުއެޅި ސަރަޙައްދުގައި ކުރަންހުރީ ބޮޑެތި މަރާމާތު ކަމަށްވެސް ސިޓީކައުންސިލުން ވަނީ ބުނެފައެވެ.

މާލޭގައި ހުންނަ ހުޅުމާލޭ ފެރީ ޓާމިނަލުން ފެށިގެން އިންޑަސްޓްރިއަލް ވިލެޖާ ހަމައަށް ބޮޑުތަކުރުފާނު މަގުގައި ތާރު އެޅީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ.