އަލް މަޝްޢަރު ޙައްޖު އެންޑް އުމްރާ ގްރޫޕުން ރަމަޟާން މަހު އުމްރާއަށް ގެންދިޔަ މީހުން ދަތުރުކުރާ ފްލައިޓް ޗާޓަރު ކުރި ޓްރެވަލް އެޖެންސީއަށް ދޭން ޖެހޭ ފައިސާ ނުދައްކާތީ، އުމްރާވެރިން ރާއްޖެއަށް ގެނެސްދެވެން ނެތްކަމަށް ޓްރެވަލް އެޖެންސީން އަންގާފައިވަނިކޮށް ފައިސާގެ އެއްބައި ދެއްކުމުން ރޭ ފުރަން ހަމަޖެހިފައިވާ އުމްރާވެރިން ރާއްޖެ އައުމަށް ފުރައިފިއެވެ.

މަޝްޢަރު ގުރޫޕުގެ އުމްރާވެރިންގެ ތެރެއިން 8 އުމްރާވެރިއެއް ރޭ ވަނީ ރާއްޖެ އައުމަށް ފުރާފައެވެ. އެމީހުންނަށް ރާއްޖެ އާދެވޭނީ މިއަދު މެންދުރު ފަހު 2:30 ގައެވެ. އެޖަމާޢަތުގެ ޙަވާލުގައި މިއަހަރު ޢުމްރާއަށްދިޔަ މީހުންގެ ތެރެއިން ބާކީތިބި 130 އުމްރާވެރިންނަށްވެސް އެއާޕޯޓަށް ދިޔުމަށް މިހާރު ވަނީ އަންގާފައެވެ.

އަލް މަޝްއަރު ހައްޖު އެންޑް އުމްރާ ގުރޫޕްގެ ހަވާލުގައި މިއަހަރުގެ ރަމަޟާންމަހު 138 މީހަކު އުމްރާއަށް ގޮސްފައިވާއިރު، އެމީހުން ހައްޖަށް ގެންދަން ފްލައިޓް ޗާޓަރު ކުރި ދިވެހި ކުންފުންޏަށް ދައްކަންޖެހޭ ފައިސާގެ ޗެކުތައް ވަނީ ބައުންސްވެފައެވެ. އެހެންކަމުން އެ ގްރޫޕްގެ ހަވާލުގައި އުމްރާއަށް ދިޔަ 138 މީހުން އަނބުރާ ރާއްޖެ ނާދެވުމުގެ ބިރު ވަނީ ހީވެފައެވެ.

އަލް މަޝްއަރު އުމްރާ ގުރޫޕުން މިދިޔަ ރޯދަމަހުގެ އުމްރާ ޕެކޭޖު ވިއްކާފައިވާ އަގަކީ 36،500 ރުފިޔާއެވެ. އެއީ 30 ދުވަހުގެ އުމްރާގެއަގެވެ.

އެކަމާ ގުޅިގެން އިސްލާމިކް މިނިސްޓަރ ވިދާޅުވީ އަލް މަޝްއަރު ހައްޖު އެންޑް އުމްރާ ގުރޫޕްގެ މައްސަލަ މިނިސްޓްރީން ބަލަމުންދާކަމަށެވެ. އަދި ސަޢުދީގައި ތިބި ދިވެހި ސަރުކާރުގެ އިސް އޮފިޝަލުން މެދުވެރިކޮށް އެ ޖަމަޢާތުގެ އިސްވެރިންނާއި ވާހަކަ ދައްކައިގެން މައްސަލަ ހައްލުކުރުމަށް މަސައްކަތް ކުރަމުންދާކަމަށްވެސް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ އެ ޤުރޫޕުން އުމްރާވެރިން ރާއްޖެ ނުގެނެވޭނެ ހާލަތެއްް މެދުވެރިވި ނަމަވެސް އުމްރާވެރިން ހާލުގައި ޖެހުނަ ނުދޭނެކަމުގެ ޔަގީންކަން ސަރުކާރުން ދެއްވާކަމަށެެވެ. އަދި އޮންނަ އުސޫލުތަކުގެ ދަށުން އަަޅަންޖެހޭ ފިޔަވަޅުތައް އެ ގުރޫޕަށް އަޅާނެކަމަށްވެސް މިނިސްޓަރ ވިދާޅުވިއެވެ.

ހައްޖާއި އުމްރާއަށް ގެންދާ ގްރޫޮޕްތަކުގެ ފަރާތުން ގިނަ މައްސަލަތަކެއް ފާހަގަވަމުންދާއިރު، މިކަންކަމަށް ހަރުކަށި ފިޔަވަޅުތަކެއް އަޅަމުންދާ މަންޒަރެއް ނުފެނެވެ.