ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް 2021 ވަނައަހަރުގެ މެއި މަހުގެ ހަވަނަ ދުވަހުގެ ރޭ އައިއީޑީއެއް ގޮއްވާލައިގެން ދިން ޓެރަރިސްޓް ޙަމަލާ ރޭވުމުގެ ތުޙުމަތުކުރެވޭ އަލިމަނިކުގެ ޖަލުޙުކުމް މައާފުކުރިގޮތުގެ މައުލޫމާތު މަޖިލީހާ ހިއްސާ ކޮށްދެއްވުމަށް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙްގެ އަރިހުން އެދިވަޑައިގެންފިއެވެ.

މެއި 6 ވަނަ ދުވަހުގެ ރޭ 8:32 ގައި ނީލޯފަރުހިނގުމާއި މަޖީދީމަގާ ގުޅުނު ކަންމަތިން، ސައިކަލެއްގައި އިންޕްރޮވައިޒްޑް އެކްސްޕްލޯސިވް ޑިވައިސް (އައިއީޑީ) އެއް ހަރުކޮށްގެން ރައީސްް ނަޝީދު އަވަހާރަކޮށްލުމަށް އެ އައިއީޑީ ގޮއްވާލުމުގެ ސަބަބުން ރައީސް ނަޝީދުގެ ހަށިކޮޅަށް ބޮޑެތި އަނިޔާތަކެއްލިބި ބޭސް ފަރުވާއަށް ރާއްޖޭން ބޭރުގައި ގިނަދުވަސްތަކެއް ވަންދެން އެމަނިކުފާނު އުޅުއްވާފައިވެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން ރައީސް ނަޝީދު ވަނީ އަބްދުﷲ އަލިމަނިކަށް މައާފުދީ ދޫކޮށްލި ސަބަބާއި ގުޅޭ މައުލޫމާތު ސާފުކުރެއްވުމަށް ހެންވޭރު ހުޅަނގު ދާއިރާގެ މެންބަރު ހަސަން ލަތީފު ސިޓީއެއް ހުށަހަޅުއްވާފައިވާކަމަށް ވިދާޅުވެފައެވެ.

ޙަސަން ލަތީފްގެ ސިޓީގައި ފާހަގަކޮށްފައިވަނީ، އަލި މަނިކް ދޫކޮށްލި ސަބަބެއް ސާފުކުރުމަށް މަޖިލީހުގެ 241 ކޮމިޓީން ދެފަހަރެއްގެ މަތިން ރައީސުލްޖުމްހޫރިއްޔާގެ އޮފީހަށް ލިޔެފައިވާކަމަށާއި، އެހެންނަމަވެސް އެއްވެސް ޖަވާބެއް ލިބިފައިނުވާކަމަށެވެ. މީހުންގެ އަދަބު ލުއިކޮށްދެނީ މީހުންގެ އަޚްލާގީ ރިޕޯޓް ތައްޔާރުކޮށް އެ މައްޗަށް ބިނާކޮށްކަން ހަސަންގެ ސިޓީގައި ފާހަގަކޮށްފައިވެއެވެ. ނަމަވެސް އަލި މަނިކަށް މާފުދީ 20 އޮގަސްޓް 2019 ގައި ދޫކޮށްލިއިރު އޭނާގެ އަޚްލާޤީ ރިޕޯޓް ތައްޔާރު ކޮށްފައިވަނީ 1 ސެޕްޓެމްބަރު 2021 ގައި ކަމަށް ސިޓީގައި ބުނެފައިވެއެވެ.

"އަޅުގަނޑު އިއްޒަތްތެރި މެންބަރު އަރިހުން ދަންނަވަން އޮތީ އަޅުގަނޑަށް މި ގޮނޑީގައި އިނދެގެން މި ދެންނެވެނީ. މީގެ އިތުރަށް އަޅުގަނޑު، ރައީސުލްޖުމްހޫރިއްޔާ އަރިހުގައި މި ވާހަކަ ދަންނަވާނެ ގޮތެއް ހަމަ ހަގީގަތުގައިވެސް ނެތް. އަޅުގަނޑު ރައީސުލްޖުމްހޫރިއްޔާ އަރިހުން ވަރަށް އަދަބު އިހުތިރާމާއެކު އެދެން މި މައުލޫމާތު މި މަޖިލީހަށް މަނިކުފާނު ފޮނުވާ ދެއްވުމަށް،" ރައީސް ނަޝީދު މިއަދު ވިދާޅުވިއެވެ.

2007 ވަނަ އަހަރު ހިމަންދޫގައި ސަލާމަތީ ބާރުތަކާ ކުރިމަތިލައި ހިންގި ހަމަނުޖެހުމުގައި އަލި މަނިކު ހައްޔަރުކޮށް 10 އަހަރަށް ޖަލަށްލީ 15 މެއި 2008 ގައެވެ. ނަމަވެސް ޖަލަށްލާފައި ވަނިކޮށް ދެ ފަހަރެއްގެ މަތިން އޭނާ ވަނީ ޖަލުން ފިލައިފައެވެ. އެގޮތުން އަހަރެއްހާ ދުވަހު އޭނާވަނީ ފިލައިގެން އުޅެފައެވެ.

އަލި މަނިކު ހަރުކަށި ފިކުރު ފަތުރާ ކަމުގެ ތުހުމަތުގައި އަނެއްކާ ވެސް 2021 ވަނަ އަހަރުގެ މެއި މަހުގެ 18 ވަނަ ދުވަހު ފުލުހުން ހައްޔަރުކުރީ ރައީސް ނަޝީދަށް އަމާޒުކޮށް ހައެއް މެއި، 2021 ގައި ދިން ހަމަލާއަށްފަހު ފުލުހުން ކުރިއަށް ގެންދިޔަ އޮޕަރޭޝަނެއްގެ ތެރެއިންނެވެ.

ރައީސް ނަޝީދަށް އަމާޒުކޮށް ގޮއްވާލި އިމްޕްރޮވައިޒްޑް އެކްސްޕްލޯސިވް ޑިވައިސް (އައިއީޑީ) އަކީ ސަލްޓަންޕާކްގައި 2007 ވަނަ އަހަރު ގޮއްވާލި އައިއީޑީ އަށްވުރެ އެތައްގުނަ ބާރުގަދަ އައިއީޑީއެއް ކަމަށާއި މިއީ މިހާތަނަށް ރާއްޖޭގައި ގޮއްވާލި އެންމެ ބާރުގަދަ އައިއީޑީ ކަމަށް ޗީފް އޮފް ޑިފެންސް ފޯމް މޭޖަރ ޖެނެރަލް ޢަބްދުﷲ ޝަމާލް ވަނީ ވިދާޅުވެފައެވެ.