ޙައްޖަށް މީހުން ގެންދިއުމުގައި ހުއްދަ ދީފައިވާ މިންވަރަށްވުރެ އިތުރަށް ފައިސާ ނަގާ ކުންފުނިތަކަށް ފިޔަވަޅު އަޅާނެކަމަށް އިސްލާމިކް މިނިސްޓްރީން ހާމަކޮށްފިއެވެ.

އިސްލާމިކް މިނިސްޓްރީން ބުނީ، 1444 ވަނަ އަހަރު ޙައްޖަށް މީހުން ގެންދިއުމަށް ހުއްދަދީފައިވާ ބައެއް ކުންފުނިތަކުން ދިވެހިރާއްޖެއިން މީހުން ޙައްޖަށް ގެންދިއުމާގުޅޭ އުސޫލާ ޚިލާފަށް ކަނޑައަޅާފައިވާ އަގަށްވުރެ އިތުރަށް ފައިސާ ނަގަމުންދާކަމުގެ ޝަކުވާތައް މިނިސްޓްރީއަށް ލިބިފައިވާ ކަމަށެވެ. ޙައްޖު ކޯޕަރޭޝަންގެ އިތުރުން، ރާއްޖޭން މިއަހަރު މީހުން ޙައްޖަށް ގެންދިއުމަށް 3 ޖަމާޢަތަކަށް ވަނީ ހުއްދަދީފައެވެ. އެއީ އަލްޙަރަމައިން ގްރޫޕާއި، ސިސިލްފަރު ގްރޫޕާއި، އަލްމަނާސިކު ގްރޫޕެވެ.

އޭގެތެރެއިން އަލްޙަރަމައިން ގްރޫޕުން ޙައްޖަށް މީހުން ގެންދިއުމަށް ބިޑު ކާމިޔާބު ކޮށްފައިވަނީ 75،465 ރުފިޔާއަށެވެ. އަދި ސިސިލްފަރު ގްރޫޕުން 75،250 ރުފިޔާއަށް ބިޑް ކާމިޔާބު ކޮށްފައިވާއިރު، އަލްމަނާސިކު ގްރޫޕަށް ހުއްދަ ދީފައިވާ އަގަކީ 75،000 ރުފިޔާއެވެ. ނަމަވެސް ބައެއް ގްރޫޕްތަކުން ދަނީ ހުއްދަ ދީފައިވާ އަގަށްވުރެ އިތުރަށް ޙައްޖުވެރިންގެ އަތުން ފައިސާ ހޯދުމަށް ޑިމާންޑު ކުރަމުންނެވެ.

އިސްލާމިކް މިނިސްޓްރީން ބުނީ ގްރޫޕްތަކުން އިތުރަށް ފައިސާނަގާ މައްސަލާގައި ބަލަންޖެހޭ ކަންކަން ދަނީ ބަލަމުން ކަމަށެވެ. މީގެން ކޮންމެ ކުންފުންޏަކަށް ދީފައިވަނީ 90 ކޯޓާ އެވެ. އަމިއްލަ ކުންފުނިތަކަށް 270 ހައްޖު ކޯޓާ ދިނުމަށްފަހު ބާކީ 730 ކޯޓާ މިއަހަރު ޚާއްސަކޮށްފައިވަނީ ހައްޖު ކޯޕަރޭޝަނަށެވެ.

"މިކަން ބެލުމަށްފަހު އުސޫލާ ޚިލާފަށް ޢަމަލުކުރާ ފަރާތްތަކާމެދު ފިޔަވަޅު އަޅާނެވާހަކަ ދަންނަވަން." އިސްލާމިކް މިނިސްޓްރީން ވަނީ ބުނެފައެވެ.

އިސްލާމިކް މިނިސްޓްރީން ބުނީ، ހުއްދަ ދީފައިވާ އަގަށްވުރެ އިތުރަށް މީހުންގެ އަތުން ފައިސާ ނެގުމާއި، ކުންފުނިތަކަށް ފައިސާ ދެއްކުމާއި، ހުއްދަ ދީފައިވާ ކޯޓާއަށްވުރެ އިތުރަށް މީހުން ހައްޖަށް ގެންދިޔުމަށް އެއްވެސް ފަރާތަކުން ފައިސާ ނެގުމަކީ ދިވެހިރާއްޖެއިން ހައްޖަށް މީހުން ގެންދިއުމާބެހޭ އުސޫލުގެ ދަށުން މަނާކަމެއްކަމަށެވެ.

ހައްޖަށް މީހުން ގެންދިއުމަށް ރާއްޖެއަށް މިއަހަރު ލިބިފައިވަނީ 1000 ކޯޓާއެވެ. ނަމަވެސް ސަރުކާރުން ދަނީ ކޯޓާ އިތުރުކުރެވޭތޯ މަސައްކަތްކުރަމުންނެވެ.

ރާއްޖެއިން މިދިޔަ އަހަރު ޖުމްލަ 453 ޙައްޖުވެރިން ޙައްޖުގެ އަޅުކަން އަދާކުރުމަށް މައްކާއަށް ދިޔައެވެ. އެހުރިހާ ހައްޖުވެރިންވެސް ހައްޖަށް ދިޔައީ ސަރުކާރުގެ ހައްޖާއި އުމުރާ ކުންފުނި، ހައްޖު ކޯޕަރޭޝަންގެ ހަވާލުގައެވެ.