އިދިކޮޅު ކުދި ސިޔާސީ ޕާޓީތަކުގެ އޮތީ ސިޔާސީ އަމިއްލަ އެޖެންޑާއެއް ކަމަށާއި، ރާއްޖޭގެ ކަނޑުން ބައެއް ނުގެއްލޭކަމަށް އައްޑޫ މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.

މިދިޔަ މަހުގެ 28 ވަނަ ދުވަހު ރާއްޖެއާއި މޮރިޝަސްގެ ކަނޑުގެ ސަރަޙަދުން ފުށުއަރާ ސަރަޙައްދުގެ އިން ވަކި ކުރުމުގެ މައްސަލަ، ރާއްޖެއަށް ބޮޑު ބައި ލިބޭގޮތަށް، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސްއިން) އިން ވަނީ ނިންމައިފައެވެ. ރާއްޖެއާއި ޗާގޯސް ޖަޒީރާއާ ދެމެދު އެއްވެސް ފަރާތަކަށް 200 ނޯޓިކަލް މޭލު ހަމަނުވެ، ހާއްސަ އިގުތިސޯދީ ސަރަހައްދު ފުށުއަރާ ގާތްގަނޑަކަށް 95،000 އަކަކިލޯމީޓަރުގެ ސަރަހައްދެއް އޮވެއެވެ.

މި މައްސަލައާއި ގުޅިގެން އިދިކޮޅު ފަރާތްތަކުން އަންނަނީ ތަފާތު އެކި ވާހަކަތައް ފަތުރަމުންނެވެ. ބުދަ ދުވަހު މެންބަރު ޝަރީފް މިކަމާއި ގުޅިގެން ކުރެއްވި ޓްވީޓްތަކެއްގައި ވިދާޅުވީ ދިވެހި ޤައުމުގެ ބައިނަލްއަޤްވާމީ ކަނޑުގެ ސަރަޙައްދު (އިންޓަރނޭޝަނަލް މެރިޓައިމް ބައުންޑަރީ ލައިން) މިހާރު ކަނޑައެޅިފައިވާ ކަމަށެވެ. އަދި ރާއްޖެއަށް މިނިވަންކަން ލިބުނު ދުވަހުން ފެށިގެން 58 އަހަރު ދުވަސް ވަންދެން ހައްލު ނުވެ އޮތް މި މައްސަލަ، ސުލްޙަވެރިކަމާއެކު ހައްލުކުރެވުނީ ދާދިފަހުން އިންޓަރނޭޝަނަލް ޓްރަބިއުނަލް އޮފް ދަ ލޯ (އިޓްލޮސް) އިން ރާއްޖެއާއި އެއްކޮޅަށް ނިންމި ނިންމުމަކުން ކަމަށެވެ.

ޝަރީފް ވިދާޅުވީ ރާއްޖެއަށް ބޮޑު ކާމިޔާބީއެއް ލިބުނީ ބްލެންހައިމް ރީފަކީ މިންކުރާ ނިޝާނަކަށް ވާންޖެހޭ ކަމަށް މޮރިޝަސްގެ ޙުއްޖަތްތައް ދޮގުކޮށް، އެއީ ޓެރާ ނޫލިއަސް ނުވަތަ އެއްވެސް ބަޔަކަށް މިލްކު ނުވާތަކެއް ކަމަށް ބުނެ ކުރި ދިވެހިރާއްޖޭގެ ދައުވާތަކަށް ބާރުލިބޭ ގޮތަށް މައްސަލަ ނިމުމުން ކަމަށެވެ.

ޝަރީފް ވިދާޅުވީ އިޓްލޮސްގެ އެވޯޑްގެ ދަށުން ރާއްޖެއަށް ލިބުނީ މައްސަލަ ބޮޑުވެފައި އޮތް 95،000 އަކަކިލޯމީޓަރުގެ ކަނޑުގެ ސަރަހައްދުން 47،232 އަކަކިލޯމީޓަރު ކަމަށާއި އަދި މޮރިޝަސްއަށް ލިބުނީ 45،331 އަކަކިލޯމީޓަރުގެ ބައެއް ކަމަށެވެ. އަދި މިއީ ރާއްޖޭގެ ސަރަޙައްދު ގެއްލުނު ކަމަށް ސިޔާސީ އިދިކޮޅު ފަރާތްތަކުން ބުނި ނަމަވެސް ރާއްޖެއަށް އެއްވެސް ގެއްލުމެއް ނުލިބޭ ބޮޑު ކާމިޔާބެއް ކަމަށް ޝަރީފް ވިދާޅުވިއެވެ.

މީގެ އިތުރުން ޝަރީފް ވިދާޅުވީ ރާއްޖޭގެ ކަނޑުގެ ސަރަޙައްދުގެ ބޮޑު ބައެއް ގެއްލުނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ޗާގޯސްގެ މައްޗަށް ކުރިން އޮތް އިސްތިގުލާލީ ދައުވާތައް އަނބުރާ ގެންދިއުމުން ކަމަށް ބުނެ އިދިކޮޅު ޕާޓީތަކުން ދައްކާ ވާހަކައަކީ މުޅިން ދޮގު ވާހަކައެއް ކަމަށެވެ.

މީގެ އިތުރުން ރާއްޖެއިން ދުވަހަކު ވެސް ޗާގޯސްގެ މައްޗަށް އިސްތިގުލާލު ހޯދުމަށް ދައުވާއެއް ކޮށްފައި ނުވާ ކަމަށާއި، މިހާރުގެ މައްސަލަ އުފެދުނީ ކަނޑުގެ ސަރަހައްދު ފުށުއަރާތީ ކަމަށެވެ.

ޝަރީފް ވިދާޅުވީ ގުޅިފައިވާ އިދިކޮޅު ފަރާތްތަކުން ދަނީ ސިޔާސީ ފައިދާއަށްޓަކައި ޗަގޯސް މައްސަލައިގައި ހަގީގަތް ބަދަލުކޮށް އަނބުރާލަން މަސައްކަތް ކުރަމުން ކަމަށެވެ. އަދި ޒިންމާދާރުކަން ކުޑަ އިދިކޮޅު ޕާޓީތަކުން ތުހުމަތުކުރާ ގޮތަށް ރާއްޖެއަށް މަސްވެރިކަމުގެ އެއްވެސް ތަނެއް ގެއްލިފައި ނުވާކަމަށް އޭނާ ވިދާޅުވިއެވެ.

ހަގީގަތުގައި، މީގެ ސަބަބުން ރާއްޖޭގެ ދެކުނުގެ މަސްވެރި ކަނޑުތަކުގެ މައްޗަށް ޤާނޫނީ ގޮތުން އަދި ބައިނަލްއަޤްވާމީ ގޮތުން ޤަބޫލުކުރެވޭ، ބާރު ލިބިއްޖެ ކަމަށް ޝަރީފް ވިދާޅުވިއެވެ. އޭނާ ވިދާޅުވީ ކުދިކުދި ސިޔާސީ ޕާޓީތަކުގެ މަސްލަހަތުތަކާއި އަމިއްލަ އެޖެންޑާތައް ހާސިލް ކުރުމަށްޓަކައި ދެގައުމުގެ މައްސަލައެއް ސިޔާސީ ކުރުމަށް އިދިކޮޅު ޕާޓީތައް ގުޅިގެން ކުރާ ކެމްޕޭނަކީ ވަރަށް ނުރައްކާތެރި އަދި ދިގު މުއްދަތުގެ ނުރަނގަޅު ނަތީޖާތަކެއް ނިކުމެދާނެ ކަމެއް ކަމަށެވެ. އަދި މި މައްސަލައާއި ގުޅުވައި، އިންޑިއާއަށް ފާޑުކިއުމުން ދިވެހި ރައްޔިތުންނަށް ގެއްލުމާއި ތަކުލީފު ނޫން އެހެން ކަމެއް ހާސިލް ނުކުރެވޭނެ ކަމަށް ވެސް ޝަރީފު ވިދާޅުވިއެވެ.