ގަވާއިދާ ހިލާފަށް ފިރިހެނަކު ގައިގައި އަތްލަން ދައްކާކަށް ނުޖެހޭނެ ކަމަށް ވިދާޅުވެ މަޖިލީހުގެ ތަޅުމުގައި ނުރުހުންފާޅުކުރެއްވި ސަބަބު އައްޑޫ މީދޫ ދާއިރާގެ މެންބަރު ރޮޒައިނާ އާދަމް ހާމަކުރަށްވައިފިއެވެ.

ރޮޒައިނާ ވިދާޅުވީ، ބުރާސްފަތި ދުވަހުގެ ރައްޔިތުންގެ މަޖިލީހުގެ ޖަލްސާގައި، އޭނާގެ ނަން ރިޔާސަތުން އިއްވުމުން ތަޅުމުން ބޭރަށް ވަޑައިނުގެންނެވީ މަޖިލީހުގެ ފިރިހެން ސެކިއުރިޓީއަކު އޭނާ ތަޅުމުން ބޭރުކުރަން ދިއުމުން ކަމަށެވެ.

ބާރަށު ދާއިރާގެ ކުރީގެ މެންބަރު އިބްރާހިމް ޝުޖާއު، ރޮޒައިނާގެ ވީޑިއޯއަކާއެކު ކުރި ޓްވީޓަކާއި ގުޅިގެން ރޮޒައިނާ ވިދާޅުވީ މަޖިލިސް ގަވާއިދާ ހިލާފަށް ފިރިހެނަކު އޭނާގެ ގައިގައި އަތްލަން ދައްކާން ނުޖެހޭނެ ކަމަށެވެ. އަދި ނުވެސް ދައްކާނެ ކަމަށް ރޮޒައިނާ ވިދާޅުވިއެވެ.

"މަޑަކުން ވެސް ނުހުންނާނަން. އެތާ އަންހެނުން ތިއްބާ އަޅުގަނޑު ކައިރިއަށް ފިރިހެނެއް ފޮނުވާކަށް ނުވެސް ޖެހޭ. ގާނޫނު އަސާސީގައި އޮވޭ ގާނޫނާ ހިލާފަށް ކުރާ އަމުރަށް ކިޔަމަން ވާން ނުޖެހޭނެކަމަށް، ބުލީއެއް ނުކުރެވޭނެ." ރޮޒައިނާ ވިދާޅުވިއެވެ.

މީގެ ކުރިންވެސް މަޖިލީހުގެ މެންބަރުން ތަޅުމުން ނެރުމުގައި މަޖިލީހުގެ ސެކިއުރިޓީން އަމަލުކޮށްފައިވާ ގޮތާއިމެދު އެކި ފަރާތްތަކުން ވަނީ ކަންބޮޑުވުން ފާޅުކޮށްފައެވެ. މި އަހަރަށް މަޖިލިސް ހުޅުވި ޖަލްސާގައި އިދިކޮޅު ފިރިހެން މެންބަރުން މަޖިލީހުގެ ތަޅުމުން ނެރުމަށް އަންހެން ސެކިއުރިޓީން ހަރަކާތްތެރިވުމާއި ގުޅިގެން، އެކި ފަރާތްތަކުގެ ފާޑުކިއުން އަމާޒުވެ، މަޖިލީހުގެ އަންހެން ސެކިއުރިޓީންނަށް ފުރައްސާރަވެސް އަމާޒުވިއެވެ.

މި މައްސަލަ ހައްލުކުރުމަށް މަޖިލީހުގެ ގަވާއިދަށް، މެންބަރ ރޮޒައިނާ ހުށަހެޅުއްވި އިސްލާހު ވަނީ މަޖިލީހުން ފާސްކޮށްފައެވެ. އަދި މަޖިލީހުގެ ތަޅުމުން މެންބަރަކު ނެރޭނަމަ، ފިރިހެން މެންބަރުން ނެރެން ޖެހޭނީ ފިރިހެން ސެކިއުރިޓީން އަދި އަންހެން މެންބަރަކު ނެރޭނަމަ، މެންބަރު ނެރެން ޖެހޭނީ އަންހެން ސެކިއުރިޓީން ކަމަށް ވަނީ ގަވާއިދަށް އިސްލާހު ގެނެސް އަމަލު ކުރަން ފަށާފައެވެ.