ސިޔާސީ ޕާޓީގެ ޤާނޫނުގައި ބުނާ ތިންހާސް މެންބަރުން ހަމަނުވާ ޕާޓީތައް އުވާލުމުގައި ކޮރަޕްޝަން އެކުލެވޭ ކަމަށް ބުނުމުން ކުޑަކޮށް އޮޅުންއަރާކަމަށް އައްޑޫ މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.

މެންބަރު ޝަރީފް މިމޭރުމުން ވިދާޅުވެފައި މިވަނީ، އެމްއާރުއެމް އުވާލުމަށް އިލެކްޝަންސް ކޮމިޝަނުން ނިންމާފައިވަނީ ޣައިރު ޤާނޫނީ، ކޮރަޕްޓް އިޖުރާޢަތެއްގެ ދަށުންކަމަށް ރައީސް މައުމޫން ވިދާޅުވުމާ ގުޅިގެންނެވެ. އީސީން ރައީސް މައުމޫންގެ އެމްއާރުއެމް އުވާލާފައިވަނީ އިއްޔެއެވެ. އެޕާޓީ އުވާލުމަށް ނިންމީ ގާނޫނުގައި ބުނާ 3000 މެންބަރުން ހަމަނުވާތީ ކަމަށް އީސީން ވަނީ ބުނެފައެވެ.

އެކަމާ ގުޅިގެން އެމްއާރުއެމްގެ ލީޑަރޝިޕުން ދައްކަވަމުން ގެންދަވާ ވާހަކަތަކަށް ރައްދު ދެއްވަމުން މެންބަރު ޝަރީފް ވިދާޅުވީ، ސިޔާސީ ޕާޓީއެއްގައި 3،000 މެމްބަރުން ހަމަނުވާ ނަމަ، އެ ޕާޓީއެއް އުވައިލުމަކީ ޤާނޫނުގައި އޮތް ގޮތް ކަމަށެވެ.

"މިޔަކު އޮތީ ކޮން ކޮރަޕްޝަނެއް؟ ހަމަ ނޭނގުނޭ." މަވޯޓާ ވިދާޅުވިއެވެ.

Party akah ulhe ulhe qanoon ga vaa gothah 3000 members hama nukurevigen party gaanoonuga bayaan kuraa hama thakun uvaalumakee ekan kuran onna goi. Miyaku othee kon corruption eh.? Hama neyguney

— Ibrahim Shareef (@AdduShareef) May 24, 2023

އިލެކްޝަންސް ކޮމިޝަންގެ ނިންމުމާ ގުޅިގެން އެމްއާރުއެމްގެ ޒަޢީމް ރައީސް މައުމޫން އިއްޔެ ވިދާޅުވީ "މި ޣައިރު ޤާނޫނީ އަދި ކޮރަޕްޓް އިޖުރާޢަތާ ދެކޮޅަށް މަސައްކަތްކޮށް އިރާދަކުރެއްވިއްޔާ ކާމިޔާބު ކުރާނަން" ކަމަށެވެ.

މިކަމާއި ގުޅިގެން އިލެކްޝަންސް ކޮމިޝަންގެ ނައިބް ރައީސް އިސްމާއިލް ހަބީބު "ރަސް އޮންލައިން" އަށް މައުލޫމާތު ދެއްވަމުން ވިދާޅުވީ އެމްއާރުއެމް އުވާލާފައިވަނީ ސިޔާސީ ޕާޓީތަކުގެ ގާާނޫނުގައި ބުނާ އަދަދަށް އެ ޕާޓީގައި 3000 މެންބަރުން ހަމަ ނުވުމުން، ނޯޓިސް ފޮނުވާފައި އެ މުއްދަތުގެ ތެރޭގައި މެންބަރުން ހަމަ ނުކުރުމުން ކަމަށެވެ. އަދި އެމްއާރުއެމް އުވާލާފައިވަނީ ސިޔާސީ ޕާޓީތަކުގެ ގާނޫނާއި ގަވާއިދުގެ މަތިން ކަމަށާއި، އެކަމާއި މެދު ހިތްހަމަޖެހިވަޑައި ނުގަންނަވާނަމަ ކަމާބެހޭ ފަރާތްތަކަށް ދިއުމަށް ހަބީބު ވަނީ އެދިވަޑައިގެންފައެވެ.

ހަބީބު ވިދާޅުވީ އެ ޕާޓީއަށް ނޯޓިސް ފޮނުވި މުއްދަތު ހަމަވެފައިވަނީ އިއްޔެ ކަމަށާއި، އެ ޕާޓީއަށް ނޯޓިސް ފޮނުވީ މާޗް މަހުގައި ކަމަށެވެ. ނަމަވެސް މެންބަރުން ހަމަ ކުރަން އެ ޕާޓީން މަސައްކަތް ކޮށްފައި ނުވާއިރު، ގިނަ އަދަދެއްގެ ބަޔަކު އެ ޕާޓީން އަމިއްލައަށް ވެސް ވަކިވެވަޑައިގެންފައިވާ ކަމަށް ހަބީބު ވިދާޅުވިއެވެ. ހަބީބު ވިދާޅުވީ ގާނޫނުގައި ބުނާ އަދަދު ހަމަ ނުވުމުގެ ސަބަބުން ޕާޓީ އުވާލާކަން އަންގާ ސިޔާސީ ހަރަކާތް ކުރިއަށް ގެންދިއުން މަނާކޮށްފައިވާނެ ކަމަށެވެ.

އެމްއާރުއެމްގެ 3000 މެންބަރުން ހަމަކުރަން ބޭނުންވަނީ 29 މެންބަރުންނެވެ. ނަމަވެސް ނޯޓިސް ފޮނުވި ފަހުން ދެ ބުރެއްގެ މަތިން ޖުމްލަ 140 ފޯމް ހުށަހެޅި ނަމަވެސް އޭގެ ތެރެއިން ސައްހަ ފޯމުގެ އަދަދަކީ 66އެވެ. ނަމަވެސް މި ފަހުން ޕާޓީ ތެރޭގައި ހިނގައިދިޔަ ކަންތައްތަކަކާއި ގުޅިގެން ގިނަ އަދަދެއްގެ ބަޔަކު ޕާޓީން ވަކިވެފައިވާތީ އެޕާޓީގައި ގާނޫނުގައި ބުނާ އަދަދު މިހާރު ހަމައެއް ނުވެއެވެ.

އެމްއާރުއެމް އުވާލުމާއި ގުޅޭގޮތުން އިލެކްޝަނުން ކޮށްފައިވާ އިއުލާނުގައި ބުނެފައިވަނީ ސިޔާސީ ޕާޓީގެ ޤާނޫނުގެ 30 ވަނަ މާއްދާގެ (ހ)ގެ 1 ވަނަ ނަންބަރުގައިވާ ގޮތުގެމަތިން މޯލްޑިވްސް ރިފޯމް މޫވްމަންޓް (އެމް.އާރު.އެމް) އުވާލުމަށް އެކޮމިޝަނުން އިއްޔެވަނީ ނިންމާފައި ކަމަށެވެ.

އެހެންކަމުން އެ ޕާޓީގެ ދަރަންޏެއްވާނަމަ އެކަން އެކޮމިޝަނަށް އެންގުމަށް އިއުލާނުގައި ވެއެވެ.