ޗަމްޕާ ބްރަދާސްގެ ފަރާތުން ރަމަޟާންމަހު މާލެސިޓީގެ ގޭބިސީތަކަށް ވެދެއްވި އެހީތެރިކަމަށްޓަކައި މާލޭގެ މޭޔަރ ޑރ. މުޙައްމަދު މުއިއްޒު ޗަންޕާ އުއްޗުއަށް ޝުކުރު ދަންނަވައިފިއެވެ.

ފާއިތުވީ ރަމަޟާން މަހު މާލޭގެ ގޭބީސީތަކުގެ ކެއިންބުއިމާބެހޭ އާންމު ޚަރަދުބަރަދަށް ލުއިކަން ދެއްވުމުގެ މާތް މަޤުސަދުގައި ޗަންޕާ ބްރަދާރސްގެ ފަރާތުން ޗަންޕާ މުޙައްމަދު މޫސާ ދެއްވި ދީލަތި އެހީތެރިކަމަށްޓަކައި މާލެސިޓީ ކައުންސިލުންވަނީ އުއްޗުއަށް ހަނދާނީފިލައަކާއި ހަނދާނީ ލިޔުމެއް އަރުވާފައެވެ.

އެކަމަށްޓަކައި ބޭއްވި ބައްދަލުވުމުގައި ޗަމްޕާ ބްރަދާސްގެ ފަރާތުން ޗަންޕާ މުޙައްމަދު މޫސާ ވަނީ ޗަންޕާ ބްރަދާސްގެ ފަރާތުން ފޯރުކޮށްދިން ތަކެތި މާލޭ ރައްޔިތުންނަށް ބެހުމުގެ އިންތިޒާމްތައް ވަރަށް ފުރިހަމައަށް އިންތިޒާމުކޮށް ދެއްވާފައިވާތީ މާލެސިޓީ ކައުންސިލާއި، މާލެސިޓީގެ މޭޔަރ ޑރ. މުޙައްމަދު މުޢިއްޒަށް ޝުކުރު ދަންނަވާފައެވެ.

މާލެސިޓީ ކައުންސިލްގެ ފަރާތުން މޭޔަރ ޑރ. މުޢިއްޒު ވަނީ ޗަމްޕާ ބްރަދާސްގެ ފަރާތުން މާލެސިޓީގެ ގޭބިސީތަކަށް ވެދެއްވި އެހީތެރިކަމަށްޓަކައި ޗަމްޕާ ބްރަދާސް އާއި ޗަންޕާ މުޙައްމަދު މޫސާ އަށް ވަރަށް ޚާއްޞަ ޝުކުރެއް ދަންނަވާފައެވެ. އަދި މިއީ ރައްޔިތުން ވަރަށް ބަލައިގަތް ކަމެއް ކަމުގައި މޭޔަރ ފާހަގަކުރެއްވިއެވެ.

ދިވެހި ރައްޔިތުންނަށް ބެހުމަށް ޗަމްޕާ ބްރަދާސްގެ ފަރާތުން މާލެސިޓީ ކައުންސިލަށް ހަވާލު ކުރެއްވި ކާށި އަދި 10 ޓަނު ކަރާ މާލެސިޓީ ކައުންސިލް މެދުވެރިކޮށް މާލެސިޓީގައި ދިރިއުޅޭ ރައްޔިތުންނަށް ވަނީ ބަހާފައެވެ. އެގޮތުން 3524 މީހަކަށް 50375 ކާށި ވަނީ ބަހާފައެވެ. އަދި 2325 މީހަކަށް 4650 ކަރާ ވަނީ ބަހާފައެވެ.