މާލެ ރައްޔިތުންނަށް ގޯތި ދޫކުރުމަށް ރައީސް ސާލިހު އިއުލާންކުރައްވާފައިވާ މަޝްރޫއުގެ ދަށުން ގޯތި ދިނުމަށްޓަކައި ގިރާވަރު ފަޅު ހިއްކަން ފަށާފައިވާ ކަމަށް ހައުސިންގ މިނިސްޓަރ މުޙައްމަދު އަސްލަމް ވިދާޅުވެއްޖެއެވެ.

މިއަހަރުގެ ރިޔާސީ ބަޔާން އިއްވަވަމުން ރައީސް ސާލިހު ވަނީ ގިރާވަރު ފަޅު ހިއްކުމަށް ފަހު މާލެ ރައްޔިތުންނަށް 2000 ގޯތި ދެއްވާނެކަން އިއުލާންކުރަށްވައިފައެވެ. ގިރާވަރު ފަޅުގެ އިތުރުން ހުޅުމާލެ އާއި ގުޅީފަޅު ހިއްކައިގެން މާލޭ ރައްޔިތުންނަށް ގޯތި ދިނުމަށް ސަރުކާރުން ވަނީ ނިންމާފައެވެ.

މާލޭ ސަރަޙައްދުން ގޯތި ލިބޭ މީހުންގެ ލިސްޓު އިޢުލާނު ކުރުމަށް އިއްޔެ ބޭއްވި ނޫސްވެރިންގެ ބައްދަލުވުމުގައި އަސްލަމް ވިދާޅުވީ ގިރާވަރު ފަޅު ހިއްކުމުގެ މަސައްކަތް މިހާރު ފަށާފައިވާ ކަމަށާއި ޖުލައިމަހުގެ ތެރޭގައި ގުޅިފަޅު ހިއްކުމުގެ މަސައްކަތްވެސް ބާރަށް ހިނގައިގަންނާނެ ކަމަށެވެ.

“ގިރާވަރުފަޅު ހިއްކުމުގެ މަސައްކަތްތަކެއް މިހާރުވެސް ފެށިގެން ކުރިއަށްް އެބަދޭ. ގުޅީފަޅު ހިއްކަން މިހާރު ބަންޑު ވެސް ޖަހާ ނިމިފައި، ޑްރެޖަރު މޮބިލައިޒް ކޮށްފައި އޮތީ.” އަސްލަމް ވިދާޅުވިއެވެ.

އަސްލަމް ވިދާޅުވީ މާލޭ ރައްޔިތުންނަށް ދޭ ގޯތިތައް ކަނޑާނެ ތަންތަން މެޕުގައި މިހާރު ފާހަގަކޮށްނިމިފައިވާ ކަމަށެވެ.

ރިޔާސީ ބަޔާނުގައި ރައީސް އިޢުލާންކުރެއްވީ މާލޭގެ ރައްޔިތުންނަށް ޚާއްސަކޮށް މާލެ ސަރަޙައްދުން 5000 ގޯތި ދޫކުރުމަށެވެ. އެއީ ހުޅުމާލެ ދެވަނަ ފިޔަވަހިން 1000 ބިމާއި، ގުޅީފަޅުން 2000 ބިން އަދި ގިރާވަރު ފަޅު ހިއްކާ އެތަނުން 2000 ގޯއްޗެވެ.

ރައީސް ވިދާޅުވީ އެމަނިކުފާނުގެ ރިޔާސީ ދައުރު ނިއްމާލާނީ މާލޭގެ ރައްޔިތުންނަށް އިން ވަކިކޮށް، ރޯނުދަމައި ބިން ކަނޑައި، ގޯތީގެ ފަތް ދިނުމަށްފަހު ކަމަށެވެ.