ރާއްޖޭގެ ކަންކޮޅުތަކުގައި 31 ކޮމިއުނިޓީ ސެންޓަރު ތަރައްގީކުރުމުގެ މަސައްކަތްދަނީ ކުރިއަށް ކަމަށް ޔޫތު މިނިސްޓަރ އަޙްމަދު މަޙްލޫފް ވިދާޅުވެއްޖެއެވެ.

ހއ. އިހަވަންދޫގައި ސަރުކާރުން ތަރައްޤީ ކުރަމުންދާ ކޮމިއުނިޓީ ސެންޓަރުގެ ފޮޓޯތަކެއް މީސް މީޑިއާގައި ޙިއްސާ ކުރަށްވަމުން މަޙްލޫފް ވިދާޅުވީ އެއީ ކުރެހުމެއް ނޫން ކަމަށާއި އެއީ މިހާރު ހުޅުވުމަށް ތައްޔާރުވަމުންދާ އިހަވަންދޫ ކޮމިއުނިޓީ ސެންޓަރު ކަމަށެވެ.

މަޙްލޫފް ވިދާޅުވީ ރައީސް ޞާލިޙްގެ ސަރުކާރުން ރާއްޖޭގެ އެކި ކަންކޮޅުތަކުގައި ތަރައްގީ ކުރައްވަމުންގެންދަވާ ޒަމާނީ ކޮމިއުނިޓީ ސެންޓަރުތަކުގެ ސަބަބުން ޒުވާނުންނާއި ކްލަބް ޖަމިއްޔާތަކަށް ގިނަ ފަސޭހަތަކެއް ލިބިގެންދާނެ ކަމަށެވެ.

“މިމަރުކަޒުތަކުގައި ކުޅިވަރު ކުޅުމުގެ އިތުރުން، ޖަމުއިއްޔާތަކަށް މަސައްކަތްކުރެވޭނެ އިންތިޒާމް ހަމަޖެހޭނެއެވެ. އަދި އިތުރު ގިނަ ލުއިފަސޭހަތަކެއް ލިބިގެންދާނެއެވެ.” މަޙްލޫފް ވިދާޅުވިއެވެ.

މިއީ ކުރެހުމެއް ނޫނެވެ.

މިއީ ރައީސް @ibusolih ރާއްޖޭގެ އެކި ކަންކޮޅުތަކުގައި ތަރައްގީ ކުރައްވަމުންގެންދަވާ ޒަމާނީ ކޮމިއުނިޓީ ސެންޓަރުތަކުގެ ތެރެއިން ހއ. އިހަވަންދޫގައި ގާއިމްކުރެވޭ މަރުކަޒެވެ. މަސައްކަތްނިމި ހުޅުވުމާއި ގާތްވީއެވެ.

މިމަރުކަޒުތަކުގައި ކުޅިވަރު ކުޅުމުގެ އިތުރުން،… pic.twitter.com/dXwVfGjano

— Ahmed Mahloof (@AhmedMahloof) July 5, 2023

އިހަވަންދޫގައި ޔޫތު އެންޑް ކޮމިއުނިޓީ ސެންޓަރު ތަރައްޤީ ކޮށްދޭނެ ފަރާތެއް ހޯދުމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އިން އިއުލާންކުރީ 2021 ވަނަ އަހަރުގެ ނޮވެމްބަރު މަހުގެ 29 ވަނަ ދުވަހުއެވެ.

އެމަސައްކަތްކުރުމަށް ޓޫއޭ ކޮމްޕެނީ ޕްރައިވެޓް ލިމިޓެޑާއި މިނިސްޓްރީ އޮފް ޔޫތުން ހަވާލުކުރީ 2022 ވަނަ އަހަރުގެ ފެބްރުއަރީ މަހުގެ 24 ވަނަ ދުވަހުއެވެ. ސެންޓަރު އިމާރާތްކުރުމުގެ އަމަލީ މަސައްކަތް ފަށާފައިވަނީ 2022 ވަނަ އަހަރުގެ މާރިޗް މަހުގެ 14 ވަނަ ދުވަހުއެވެ.

އިހަވަންދޫގައި އިމާރާތްކުރަމުންދާ ޔޫތު އެންޑް ކޮމިއުނިޓީ ސެންޓަރުގެ މަސައްކަތް ޓޫއޭ ކޮމްޕެނީ ޕްރައިވެޓް ލިމިޓެޑާއި ހަވާލުކޮށްފައިވަނީ ހަތަރު މިލިއަން ހަތްސަތޭކަ އޮނަފަންސާސްހާސް ހަތްސަތޭކަ އެކާޅީސް ރުފިޔާ ފަނަރަ ލާރި އަށެވެ. ޓޫ އޭ ކޮމްޕެނީ ޕްރައިވެޓް ލިމިޓެޑަކީ އިހަވަންދޫ ދާއިރާގެ ކުރީގެ މެމްބަރު، އަދި މިހާރު ބާރަށު ދާއިރާގެ އިއްޒަތްތެރި މެމްބްރު އަހްމަދު އަބުދުﷲގެ ކުންފުންޏެކެވެ.