މިފަހަރުގެ ރިޔާސީ އިންތިޚާބުގައި ވާދަކުރަށްވަނީ މިހާތަނަށް ރާއްޖޭގައި އުފެއްދި އެންމެ މެންބަރޝިޕް ބޮޑު ކޯލިޝަނާ އެކުގައިކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް މިއަދު ވިދާޅުވެއްޖެއެވެ.

ރިޔާސީ އިންތިޚާބަށް އެމްޑީޕީގެ މެނިފެސްޓޯ އެކުލަވާލުމަށް އެޕާޓީގެ ޤައުމީ މަޖިލީހުން މިއަދު ކުރިއަށްގެންދާ މަޝްވަރާ ބައްދަލުވުން ފަށްޓަވައި ދެއްވަމުން ރައީސް ޞާލިޙް ވިދާޅުވީ ރިޔާސީ އިންތިޚާބަށް ނިކުމެ ވަޑައިގަންނަވަނީ 77 ހާސް މެންބަރުންގެ ކޯލިޝަނަކާއެކު ކަމަށެވެ.

މިއީ ރާއްޖޭގައި މިހާތަނަށް ރިޔާސީ އިންތިޚާބަކަށް އެކުލަވާލެވުނު އެންމެ ބޮޑު ކޯލިޝަންކަމަށް ރައީސް ވިދާޅުވިއެވެ. އެހެންކަމުން އެއްބުރުން އިންތިހާބު ކާމިޔާބުވާނޭ ކަމުގެ ޔަގީންކަން އެބައޮތް ކަމަށް ރައީސް މިއަދު ވަނީ ވިދާޅުވެފައެވެ.

“ހަތްދިހަ ހަތް ހާސް ހަތްސަތޭކަ މެންބަރުން އެބަތިބި އެމްޑީޕީއާއި އެމްޑީއޭއާއި އަދާލަތު ޕާޓީ އެއްކޮށްލުމުން. އެކީގައި މަސައްކަތް ކުރެއްވިއްޖެއްޔާ މިއީ ނިމިފައި އޮތް ކަމެއް." ރައީސް މިއަދު ވިދާޅުވިއެވެ.

MDP ge Riyaasee Candidate @ibusolih Campaign Motivational session ga vaahakafulhu dhekkevun.#Ibu2023#MDP2023 #UfaaveriAmaanRaajje pic.twitter.com/lCG8Oj0DRQ

— MDP Secretariat (@MDPSecretariat) July 8, 2023

ރައީސް ވިދާޅުވީ 2013 ގައި ރައީސް ޔާމީން އިންތިޚާބަށް ނިކުމެ ވަޑައިގަތީ 40 ހާސް މެމްބަރުންނާ އެކުގައި ކަމަށާއި ނަމަވެސް ފުރަތަމަ ބުރުގައި 98000 ވޯޓު ހޯއްދެވި ކަމަށެވެ.

ރައީސް ޞާލިޙްގެ ކެމްޕޭނު ހަރަކާތްތަކުގެ ތެރޭގައި ހިމެނޭ ދޮރުން ދޮރަށް ހިނގުމުގެ ހަރަކާތްތައް ވެސް މިހާރު ވަނީ ފަށައިފަ އެވެ.

ރިޔާސީ އިންތިޚާބު ބޭއްވުމަށް ހަމަޖެހިފައިވަނީ އަންނަ ސެޕްޓެމްބަރ 9 ވަނަ ދުވަހުއެވެ.