ޖުމްހޫރީޕާޓީގެ ލީޑަރ ޤާސިމް އިބްރާހީމްގެ އެޑްވައިޒަރުންގެ ގޮތުގައި ކުރީގެ ފަތުރުވެރިކަމާބެހޭ ވަޒީރު އަލީ ވަޙީދާއި އިތުރު ދެބޭފުޅަކު މިއަދު ހަމަޖައްސަވައިފި އެވެ.

ޖުމްހޫރީޕާޓީން މިއަދު ބުނީ ޤާސިމްގެ އެޑްވައިޒަރުންގެ ގޮތުގައި މިއަދު ކަނޑައަޅާފައިވަނީ ކުރީގެ ފަތުރުވެރިކަމާބެހޭ ވަޒީރު އަދި ޖޭޕީގެ ކުރީގެ ރައީސް އަލީ ވަހީދު އާއި ޗާންދަނީ އިސްމާއިލް ސުޖާއާއި އިބްރާހިމް ސުޖާ ކަމަށެވެ.

ޗާންދަނީ ސުޖާގެ ދެބެއިން ޖޭޕީއަށް ސޮއިކުރަށްވާފައިވަނީ މިއަދުއެވެ. އަދި އެބޭފުޅުން ވަނީ އިތުރު 300 މެންބަރުންގެ ފޯމްވެސް ޖޭޕީގެ ލީޑަރާއި ޙަވާލު ކުރަށްވާފައެވެ.

Jumhooree party @JPSecretariat ge leader @qasimibrahim ge special advisor in ge gothugai miadhu Hon @ali20waheed aai Ismail Suja ( Channdhanee) adhi Ibrahim Suja, hamajassavaifi. Congratulations! pic.twitter.com/GUYVaeC4HP

— Ahmed Nihan (@ahmed_nihan) August 2, 2023

ރިޔާސީ އިންތިޚާބަށް ކުރިމަތިލަށްވާނެ ކަމަށް އިޢުލާނުކޮށް ކެމްޕޭން ކުރެއްވި ނަމަވެސް، މިހާތަނަށް ޤާސިމް ކެންޑިޑެސީ ފޯމު ހުށަހަޅުއްވާފައެއް ނުވެއެވެ. އަދި ރަނިންމޭޓަކުވެސް ކަނޑައަޅުއްވާފައެއް ނުވެއެވެ.

ރާއްޖޭގެ ސިޔާސީ ބޭފުޅުން ޤަބޫލުކުރައްވާ ގޮތުގައި ޤާސިމް އިބްރާހީމަކީ ރާއްޖޭގެ "ކިންގ މޭކަރ"އެވެ. ކިންގ މޭކަރގެ ލަޤަބް ޤާސިމަށް ލިބިވަޑައިގަތީ މިދިޔަ 3 ރިޔާސީ އިންތިހާބުގައިވެސް އެމަނިކުފާނު ތާއީދުކުރައްވާ ބޭފުޅަކަށް ވެރިކަން ލިބިވަޑައިގަންނަވާތީއެވެ.