ގޭންގުތައް ރޫޅާލައި ރަށުތެރެ އަމާންކުރަށްވާނެ ކަމަށް މިފަހަރުގެ ރިޔާސީ އިންތިޚާބުގައި އަމިއްލަ ގޮތުން ވާދަކުރަށްވާ ޢުމަރު ނަސީރު ވިދާޅުވެއްޖެއެވެ.

އަމިއްލަ ގޮތުން ރިޔާސީ އިންތިޚާބުގައި ވާދަކުރަށްވާ ޢުމަރު މިހާރު ވަނީ ކެމްޕޭން ފަށްޓަވާފައެވެ. އެގޮތުން ޑޯ ޓު ޑޯ ޙަރަކާތްތައްވެސް ޢުމަރު ގެންދަވަނީ ހިންގަވަމުންނެވެ.

ޢުމަރުގެ ވަޢުދުނާމާ އިޢުލާނު ކުރަށްވަމުން ގެންދަވާއިރު އުމަރު ވިދާޅުވެފައިވަނީ، ޢުމްރާނީ ތަރައްޤީއަށްވުރެ ޤައުމަށް މިވަގުތު ބޭނުންވަނީ އިޖްތިމާޢީ ހަމަޖެހުން ގެނެސްދޭނެ ވެރިއެއް ކަމަށެވެ. އެގޮތުން އެއާރޕޯޓާއި ބަނދަރާއި ނަރުދަމާއަށްވުރެންވެސް މުހިންމުވަނީ މަސްތުވާތަކެތީގެ ނުރައްކަލުން ދަރިން ސަލާމަތްކުރުން ކަމަށް ޢުމަރު ވިދާޅުވިއެވެ.

އެގޮތުން އޭނާގެ ވެރިކަމެއްގައި ޑްރަގު ވިއްކާ ގޭންގުތައް ރޫޅާލައި ރަށުތެރެ އަމާންކުރަށްވާނެ ކަމަށް ޢުމަރު ވިދާޅުވިއެވެ.

"ލަކުޑި ގަޑެއްގެ ބަދަލުގަ، ލަކުޑި ގަޑެއް ނުލާތި. ލަކުޑި ގަޑެއްގެ ބަދަލުގައި މިފަހަރު ލާންވާނީ ދަގަޑު ގަޑެއް." ޢުމަރު ވިދާޅުވިއެވެ.

އެއާާރޕޯޓާ ބަނދަރާާ ނަރުދަމާއަށްވުރެންވެސް މުހިންމުވަނީ މަސްތުވާތަކެތީގެ ނުރައްކަލުން ދަރިން ސަލާމަތްކުރުން. ޑްރަގު ވިއްކާ ގޭންގުތައް ރޫޅާލާފަ ރަށުތެރެ އަމާންކުރުން pic.twitter.com/wjz3PWF437

— 2023UMAR (@2023Umar) August 12, 2023

ޢުމަރު ވިދާޅުވެފައިވަނީ މިފަހަރު އިންތިޚާބަށް ކުރިމަތިލެއްވީ ރައީސުލްޖުމްހޫރިއްޔާ ބަދަލު ކުރުމަށް ނޫން ކަމަށާއި މިއީ ގައުމުގެ މިސްރާބު ބަދަލު ކުރަން ކުރާ މަސައްކަތެއް ކަމަށެވެ.

ރިޔާސީ އިންތިޚާބު އޮންނާނީ އަންނަ ސެޕްޓެމްބަރ 9 ވަނަ ދުވަހުއެވެ.