"ބިންވެރިޔާ ސްކީމް" ގެ ދަށުން ހުޅުމާލޭން ގޯތި ލިބުނު މީހުންނަށް ގޯތި ދިނުމަށްޓަކައި، ހުޅުމާލޭ ފަޅު ހިއްކަން ޗައިނާގެ ސީއެމްއީސީއާ ހަވާލުކޮށްފިއެވެ.

"ބިންވެރިޔާ ސްކީމް" ގެ ދަށުން މާލޭ ސަރަޙައްދުން ގޯތި ލިބޭ މީހުންގެ ދާއިމީ ލިސްޓް ދިވެހި ސަރުކާރުގެ ގެޒެޓްގައި ޝާއިޢު ކޮށްފައިވަނީ މިމަހުގެ 14 ވަނަ ދުވަހުއެވެ. އަދި ލިސްޓުގައި ހިމެނޭ މީހުންނަށް ގުރުލައިގެން ގޯތި ދޫކުރުމުގެ މަސައްކަތް ސަރުކާރުން ވަނީ މިމަހުގެ 15 ވަނަ ދުވަހު ފަށާފައެވެ.

ސަރުކާރުގެ ބިންވެރިޔާ ސްކީމްގެ ދަށުން މާލޭ ރައްޔިތުންނަށް އެންމެ ބޮޑުކޮށް ދޫކުރަނީ 4،000 އަކަފޫޓްގެ ގޯއްޗެވެ. އަދި އެންމެ ކުޑަކޮށް ދޫކުރުމަށް ހަމަޖެހިފައިވަނީ 1،250 އަކަފޫޓްގެ ގޯއްޗެވެ.

މަޢުލޫމާތު ލިބިފައިވާ ގޮތުގައި ހުޅުމާލޭ ދެ ވަނަ ފިޔަވަހިން ގޯތި ދޫކުރަން ބޭނުންވާ ބިން ހިއްކުމަށް ޗައިނާ މެޝިނަރީ އިންޖިނިއަރިން ކޯޕަރޭޝަން (ސީއެމްއީސީ)އާ ހަވާލުކޮށްފައިވަނީ އިއްޔެއެވެ. އެކުންފުންޏަކީ ރައީސް ޔާމީންގެ ސަރުކާރުގައި ހުޅުމާލޭގައި ފްލެޓް އެޅުމާއި، ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އާ ޓާމިނަލްގެ މައްސަކަތް ވެސް ކުރި ކުންފުންޏެވެ.

ސަރުކާރުން ނިންމާފައިވަނީ މާލޭ މީހުންނަށް ގޯތި ދިނުމަށްޓަކައި ހުޅުމާލޭ މާސްޓަޕްލޭން ބަދަލުކޮށް، ދެ ފޭސް ގުޅޭ ޓަނަލް ސަރަހައްދާ ހަމައަށް ހިއްކުމަށެވެ. އެސަރަޙައްދު މީގެ ކުރިން ބޭނުންކުރަމުން ގެންދިޔައީ ސަފާރީ އުޅަނދުތައް ބަނދަރު ކުރުމަށެވެ.

ބިންވެރިޔާ ސްކީމްގެ ދަށުން ހުޅުމާލެއިން 1،351 ގޯތި ދިނުމަށް ނިންމާފައިވާއިރު ގުޅީފަޅުން 2،218 ގޯތި ދިނުމަށް ވަނީ ހަމަޖެހިފައެވެ. އޭގެ އިތުރުން ގިރާވަރު ފަޅުން 5،432 ގޯތި ދޭނެކަމަށް ހައުސިން މިނިސްޓްރީން މަޢުލޫމާތު ދެއެވެ.

ގޯތި ލިބުމަށް ޝަރުތު ހަމަވާ 19،631 މީހުން ތިބި ނަމަވެސް އޭގެތެރެއިން މިހާރު ލިބެން ހުރި 9003 ގޯތި ދެވެން އޮތީ އެތަނުން 18،948 މީހަކަށް ކަމަށް ހައުސިންގ މިނިސްޓްރީން ވަނީ ބުނެފައެވެ.

މާލެއަށް ދިމާވެފައިވާ ބޯހިޔާވަހިކަމުގެ ދަތިކަން ޙައްލުކުރުމަށްޓަކައި، ރައީސުލްޖުމްހޫރިއްޔާ ވަޢުދުވެ ވަޑައިގެންނެވި ގޮތަށް މާލެ ސަރަޙައްދުން ބަންޑާރަ ގޯތި ދޫކުރުމަށް ހިންގާ "ބިންވެރިޔާ" ސްކީމަކީ، މިހާތަނަށް ރާއްޖޭގައި ހިންގާ ބަންޑާރަ ގޯތި ދޫކުރުމުގެ އެންމެ ބޮޑު ޕްރޮގްރާމެވެ.