ރައްޔިތުންގެ މަޖިލީހުގެ އިދާރީ މަސައްކަތްތަކާއި ހިންގުމުގެ ހަރަދަށް 196.2 މިލިއަން ރުފިޔާގެ ބަޖެޓެއް އާންމު ކޮމިޓީން މިއަދު ފާސްކޮށްފި އެވެ.

މިއަދު ބޭއްވި އާއްމު ކޮމިޓީގެ ބައްދަލުވުމުގައި މަޖިލިސް މުވައްޒަފުންނަށް މުސާރައިގެ ކުރިއެރުމެއް ނުދޭތާ 11 އަހަރު ވެފައިވާތީ، މުވައްޒަފުންގެ އެލަވަންސްތައް ބޮޑު ކުރުމަށް ވަނީ ނިންމާފައެވެ. އެހެންކަމުން އެލަވަންސްތައް ބޮޑުކުރަން އަންނަ އަހަރު ހޭދަވާ 4.6 މިލިއަން ރުފިޔާއާ އެކު، ޖުމްލަ 196.2 މިލިއަން ރުފިޔާގެ ބަޖެޓެއް އާންމު ކޮމިޓީގެ މިއަދުގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުން ވަނީ ފާސްކޮށްފަ އެވެ.

މަޖިލީހުގެ އިދާރާއިން ވަނީ އަންނަ އަހަރު މަޖިލިސް ހިންގުމަަށް 187 މިލިއަނެއްހާ ރުފިޔާ ހަރަދުވާނެ ކަމަށް ލަފާކޮށްފައެވެ. މިއީ މި އަހަރަށް ފާސްކޮށްދިން 182 މިލިއަން ރުފިޔާގެ ބަޖެޓާއި އަޅާބަލާއިރު އިތުރު އަދަދެކެވެ.

މިއަހަރަށްވުރެ އަންނަ އަހަރަށް ފާސްކުރާ ބަޖެޓް ބޮޑުވާނެކަމަށް މަޖިލީހުން ލަފާކުރަނީ އަންނަ އަހަރު އިތުރަށް އިންތިހާބު ކުރާ މެމްބަރުންގެ ހަރަދުތައް ހަމަޖައްސަން ޖެހޭނެތީ ކަމަށް މަޖިލީހުން ބުނެއެވެ.

އަންނަ އަހަރު މަޖިލިހަށް އަލަށް އައްޔަންކުރާ ހަ ދާއިރާއެއް ހިމެނެއެވެ. އޭގެތެރޭގައި ހިމެނެނީ ބ. އަތޮޅަށް އެއް ގޮނޑި، ކ. އަތޮޅަށް އެއް ގޮނޑި، މާލެއަށް ދެ ގޮނޑި، ގއ. އަތޮޅަށް އެއް ގޮނޑި އަދި އައްޑުއަށް އެއް ގޮނޑިއެވެ.

މާބޮޑު މަސައްކަތެއް ނުކުރިޔަސް އަންނަ އަހަރު މަޖިލިހަށް ޖުމްލަ 93 މެމްބަރުން އައްޔަންކުރާނެއެވެ. ރައްޔިތުން ދެކޭގޮތުގައި މަޖިލީހަކީ ބޭކާރު ހަރަދުކޮށް، ބޭކާރު ވަގުތުތަކެއް ދުއްވާލުމަށް އޮންނަ މުއައްސަސާއެކެވެ. މިހާރުވެސް އެ މަޖިލިސް ހުއްޓިފައި އޮންނަތާ އެތައް ދުވަހެއް ވެއްޖެއެވެ. ނަމަވެސް ދިވެހި ރައްޔިތުންގެ ފައިސާއިން މިއަހަރުވެސް 182 މިލިއަން ރުފިޔާގެ ބަޖެޓެއް މަޖިލީހަށް ވަނީ ދީފައެވެ.


ކިޔުންތެރިންގެ ހިޔާލު



ޓްރެންޑިން