މިނިސްޓްރީއޮފް ކްލައިމޭޓް ޗޭންޖް، އެންވާރަމަންޓް އެންޑް އެނާރޖީއާއި އެކު ވެފައިވާ އެއްބަސްވުމުގެ ދަށުން ވިލިމާލޭގެ ކަރަންޓުގެ ހާލަތު ދެނެގަތުމަށް އެ އަވަށުގައި ސާރވޭއެއް ހެދުމުގެ މަސައްކަތް ރާއްޖޭގެ ކަރަންޓު ކުންފުނި، ސްޓެލްކޯއިން މިއަދު ކުރިއަށް ގެންގޮސްފިއެވެ.

ވިލިމާލޭގެ ކަރަންޓުގެ ހާލަތު ދެނަގަތުމުގެ އިތުރުން ޕަވަރ ނިޒާމު ތަރައްގީކޮއް، ހިދުމަތް އިތުރަށް ފުރިހަމަ ކުރުމާއެކު، ވިލިމާލެއަށް ބޭނުންވާ ކަރަންޓު ފޯރުކޮށްދިނުމަށް ހިންގާ މި ޕްތޮގްރާމްގައި ސްޓެލްކޯގެ ޓްރާންސްމިޝަން އެންޑް ޑިސްޓްރިބިއުޝަން ޑިޕާޓްމަންޓާއި، ރީޖަނަލް ޕަވަރހައުސް ޑިޕާޓްމަންޓް ވަނީ ބައިވެރިވެފަ އެވެ.

މި މަސައްކަތަކީ އެންވައިރަމެންޓް މިނިސްޓްރީ އާއި ސްޓެލްކޯއާ ދެމެދެ 23 ޑިސެމްބަރ 2023 ގައި ސޮއެކުރެވުނު އެއްބަސްވުމުގެ ދަށުން ހިނގަމުންދާ މަސައްކަތެކެވެ. މި އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ މިނިސްޓަރ ޠާރިޤް އިބްރާހިމް އެވެ. އަދި ސްޓެލްކޯގެ ފަރާތުން ސޮއި ކުރެއްވީ ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ އެވެ.

މި ފަހުމުނާމާގެ މަޤްޞަދަކީ، މިހާރު ވިލިމާލޭގައި އިތުރުވަމުންދާ ޑިމާންޑާ އެއްވަރަށް ކަރަންޓުގެ ޚިދުމަތް ފޯރުކޮށްދިނުމަށް ހުރި ގޮންޖެހުންތަކާއި، މިހާރު ބޭނުންކުރަމުންދާ ނިޒާމުގައި ހުރި މައްސަލަތަކާއި، އެ މައްސަލަތައް ޙައްލުކުރުމަށް ކުރަންހުރި މަސައްކަތްތަކަކީ ކޮބައިކަމާއި، ކުރިއަށްއޮތް ވިހިއަހަރު ދުވަހަށް ޑިމާންޑް އިތުރުވާނެ މިންވަރާއި، މި ނިޒާމުގެ ކެޕޭސިޓީ އިތުރުކުރުމަށް ކުރަންހުރި މަސައްކަތްތަކާއި، މަރާމާތުކުރުމަށާއި، ކެޕޭސިޓީ އިތުރުކުރުމަށް ބޭނުންވާ އިންވެސްޓްމަންޓް ދެނެގަތުމާއި، ނިޒާމު މަރާމާތު ކުރުމަށާއި އަޕްގްރޭޑްކުރުމަށް މަޝްރޫޢުއެއް އެކުލަވާލައި އެ މަޝްރޫޢު ތަންފީޛުކުރާނެ ގޮތުގެ އެކްޝަންޕްލޭނެއް ތައްޔާރު ކުރުމެވެ.