ޕީޕީއެމް ޕްރައިމަރީގެ ވޯޓުލުން އިންސާފުވެރިކޮށް ކުރިޔަށް ގެންދިއުމަށް ޕްރައިމަރީގައި ވާދަކުރަށްވާ ދުންޔާ މައުމޫން ގޮވާލައްވައިފިއެވެ.

ދުންޔާ މިމޭރުމުން ގޮވާލައްވާފައިވާއިރު ޕީޕީއެމް މަޖިލީސް ޕްރައިމަރީގެ ވޯޓާސް ލިސްޓުގައި މައްސަލަތަކެއް އުޅޭތީ ކަލާފާނު ސްކޫލުގައި ބަހައްޓާފައި ހުރި މެދު ހެންވޭރު އަދި ހެންވޭރު ދެކުނު ފޮށި ކައިރި ވަނީ ހަމަނުޖެހުން ހިނގައިފަ އެވެ. އަދި ރެހެންދި ސްކޫލުގައި ބަހައްޓާފައި ހުރި ހުޅުމާލޭ ދެކުނު ދާއިރާގެ ފޮށި ކައިރީގައި ވެސް ވަނީ ހަމަނުޖެހުން ހިނގައިފަ އެވެ.

އެކަމާ ގުޅިގެން ދުންޔާ މިއަދު ވިދާޅުވީ ހުޅުމާލޭ ދެކުނު ދާއިރާގެ ވޯޓު ފޮށީގައި އެހެން ދާއިރާއެއްގެ މީހުން ލާފައިވާ ވޯޓުތަކެއް ހުރިކަމުގެ ހިތްހަމަނުޖެހުންތަކެއް ހުރިކަމަށެވެ. އެހެންކަމުން އެހެން ކެންޑިޑޭޓުންނާ މަޝްވަރާ ކުރަމުންދާކަމަށް ދުންޔާ ވިދާޅުވިއެވެ.

“އަޅުގަނޑަށް ފެންނަ ގޮތުގައި ޕީޕީއެމް ޕީއެންސީ ކޯލިޝަނުން އަޅުގަނޑުމެންގެ ޕާޓީން އެބަޖެހޭ ވަރަށް އިންސާފުވެރިކޮށް މި ޕްރައިމަރީތައް ކުރިއަށް ގެންދަން.” ދުންޔާ ވިދާޅުވިއެވެ.

Problems in hulhumale dhekunu primary vote! Appeal to ppm-pnc leadership to ensure a democratic, free & fair process that has the trust of our party people in hulhumale dhekunu dhaaira! Fairness & justice for all candidates. pic.twitter.com/Tnpd6Ixse1

— Dunya Maumoon (@dunyamaumoon) January 27, 2024

ދުންޔާ ވަނީ ޕްރައިމަރީ އިންސާފުވެރިކޮށް ކުރިއަށް ގެންދާނެކަމަށް އުންމީދު ކުރަށްވާ ކަމަށްވެސް ވިދާޅުވެފައެވެ.

މިއަދު ކުރިއަށްދާ ޕީޕީއެމް ޕްރައިމަރީގައި 73 ދާއިރާއަކަށް 283 ކެންޑިޑޭޓުން ދަނީ ވާދަކުރަމުންނެވެ. މިޕްރައިމަރީގައި ޖުމުލަ 227 ވޯޓު ފޮށި ބަހައްޓާފައިވާއިރު ޕްރައިމަރީގައި ވޯޓުލުމުގެ ހައްޤު 71،597 މީހަކަށް ވަނީ ލިބިފައެވެ.