ރާއްޖޭގެ ޖަލުތަކުގައި ހަރުކަށި ފިކުރު ފަތުރާ މައްސަލައަށް ހައްލެއް ހޯދުމަށް، އެފަދަ ފަރާތްތަކަށް ހާއްސަ ކޮށްގެން ރިހެބިލިޓޭޝަން ޕްރޮގްރާމެއް ފަށަން ނިންމާފައިވާކަމަށް ހޯމް ލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރ އިހުސާން ވިދާޅުވެއްޖެއެވެ.

އިހުސާން މިރޭ ވިދާޅުވީ، ޖަލުގައި ތިބޭ ފަރާތްތައް ހަރުކަށި ފިކުރަށް ލަންބައި، އެފިކުރަށް ގެންދިޔުމުގެ މަސައްކަތްތަކެއް ޖަލުތަކުގައި ކުށްވެރިންގެ މެދުގައި ވަރަށް ބޮޑަށް އޮންނަކަމަށެވެ.

އެހެންކަމުން، އެފަދަ ފަރާތްތަކަށް ހާއްސަކޮށްގެން ރިހެބިލިޓޭޝަން ޕްރޮގްރާމެއް އިސްލާމިކް މިނިސްޓްރީއާއި ގުޅިގެން ފަރުމާކޮށް ކުރިއަށް ގެންދަން ރާވާފައިވާކަމަށާއި އެ ޕްރޮގްރާމް މި ފެށޭ ހަފުތާތެރޭގައި ފެށޭނެކަމަށް އިހުސާން ވިދާޅުވިއެވެ.

އޭނާ ވިދާޅުވީ، އެ ޕްރޮގްރާމްގެ ތެރެއިން، ހަރުކަށި ފިކުރުގެ ފަރާތްތަކަށް ފަރުވާ ދިނުމަށް، ހާއްސަ އިސްލާމިކް ނޮލެޖާއި ތަރުބިއްޔަތު ފޯރުކޮށްދިނުމަށް އެމީހުންނާ ވާހަކަދައްކައި އެމީހުންއުފައްދާ ސުވާލުތަކަށް ޖަވާބުދާރީ ވެވޭފަދަ ދީނީ އިލްމުވެރިން ގެންގޮސްގެން އެކަން ކުރިއަށް ގެންދަވާނެކަމަށެވެ.

"އެކި ކުށްތަކުގައި ޖަލަށްލާފައި ތިބޭ މީހުންގެ އެބަ ހުރޭ ހަރުކަށި ފިކުރު. ހަމަ އެއާއިއެކު ޖަލުގެ ތެރޭގައި ދިމާވާ މީހުން ހަރުކަށި ފިކުރުގެ ތެރެއަށް ލަންބާ ގެންދިޔުމާ، މިބައިވެސް އެބައޮތް، ރެކްރޫޓްމަންޓް އެބައޮތް އާދަޔާ ހިލާފަށް." މިނިސްޓަރު އިހުސާން ވިދާޅުވިއެވެ.

އިހުސާން ވިދާޅުވީ، މި ޕްރޮގްރާމްގެ ތެރެއިން، އެ ފަދަ ފަރާތްތައް އެހެން ކުށްވެރިންނާ ވަކިން ޒޯނެއްގައި ބައިތިއްބައިގެން ހާއްސަ ފަރުވާ ދިނުމުގެ މަސައްކަތް ކުރިއަށް ގެންދާނެކަމަށެވެ.