55 އަހަރުވެގެން ރިޓަޔާވާ މުވައްޒަފުންނަށް ޕެންޝަން ހަމަޖެއްސުމުގެ އިދާރީ މަސައްކަތް ފަށާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިމޭރުމުން ވިދާޅުވީ ޢާންމުންގެ ސުވާލުތަކަށް މީސްމީޑިއާގައި ސީދާ ރައީސުލްޖުމްހޫރިއްޔާ ޖަވާބުދެއްވުމުގެ ގޮތުން، ރައީސުލްޖުމްހޫރިއްޔާގެ އޮފީހުން ކުރިއަށް ގެންދާ "ރައީސްގެ ޖަވާބު"ގައި ވާހަކަފުޅު ދައްކަވަމުންނެވެ.

އެގޮތުން އުމުރުން 55 އަހަރުވެގެން ރިޓަޔާވާ ސިވިލް ސަރވިސް މުވައްޒަފުންނަށް އެލަވަންސެއް ލިބެންފަށާނެ ދުވަހެއް ސާފު ކުރުމަށް ގއ.ގެމަނަފުށީ މުޝްތަރީގޭ މުޙައްމަދު ނާފިޒްް ކުރެއްވި ސުވާލަކަށް ޖަވާބު ދެއްވަމުން ރައީސް ވިދާޅުވީ، އެކަމުގެ އިދާރީ މަސައްކަތް މިހާރު ފަށާފައިވާ ކަމަށެވެ. އެގޮތުން އެކަމަކީ ރައްޔިތުންގެ މަޖިލީހުން ހައްލެއް ބޭނުންވާ ކަމަކަށްވާތީ، ގާނޫނީ ގޮތުން ކުރަންޖެހޭ ކަންކަން ކުރުމަށް އެޓާނީ ޖެނެރަލްގެ އޮފީހާއެކު މަސައްކަތް ކުރަމުންދާކަމަށް ރައީސް ވިދާޅުވިއެވެ.

"ގާނޫނުގެ ތެރެއިން މިއަށް މަގުފަހިކުރަން އެބަޖެހޭ. މަޖިލީހަށް ފޮނުވަންޖެހޭ އިސްލާހުތަކެއް ވެސް ހުންނާނެ." ރައީސް ވިދާޅުވިއެވެ.

ރައީސްގެ ޖަވާބު
22 ފެބްރުވަރީ 2024

ގއ.ގެމަނަފުށީ ސްކޫލް ޓީޗަރެއްކަމުގައިވާ، އެރަށު، މުޝްތަރީގޭ، މުޙައްމަދު ނާފިޒް، އުމުރުން 55 ވެގެން ރިޓަޔަރވާ ސިވިލްސާވިސް މުވައްޒަފުންނަށް އެލަވަންސެއް ލިބެމުންދާނެ ގޮތެއް ނޯންނާތީ ދެންނެވި ސުވާލަށް ރައީސުލްޖުމްހޫރިއްޔާ ދެއްވި ޖަވާބު pic.twitter.com/0PDWrle0NU

— Government of Maldives (@governmentmv) February 22, 2024

އުމުރުން 55 އަހަރު ވެގެން ރިޓަޔާވާ ސިވިލް ސަރވިސް މުވައްޒަފުންނަށް އެލަވަންސެއް ހަމަޖެއްސުމަކީ ރައީސް ޑރ. މުޢިއްޒުގެ އިންތިޚާބީ ވަޢުދެކެވެ.