މީގެ ކުރިން މިއީ މުޒާހަރާ ޤާނޫނު އަސާސީ ކަމަށް ވިދާޅުވި ރައީސް ނަޝީދުގެ ރާގު ބަދަލުވެ، މިއީ ތަބީއީ ގޮތުން ރިޔާސީ ނިޒާމަށް ފައްކާވެފައި އޮތް ގާނޫނު އަސާސީއެއް ނޫން ކަމަށް ފެހިޤާނޫނު އަސާސީގެ ދަށުން ރާއްޖޭގައި އެންމެ ފުރަތަމަ ބޭއްވި ރިޔާސީ އިންތިޚާބު ކާމިޔާބު ކުރެއްވި މިހާރުގެ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ، ފެހި ގާނޫނު އަސާސީއަށް 12 އަހަރު ފުރުމުގެ މުނާސަބަތުގައި މަޖިލީހުގެ މީޑީއާއަށް ދެއްވި އިންޓަވިއުއެއްގައެވެ. ރައީސް ނަޝީދު ވިދާޅުވީ، ގާނޫނު އަސާސީއަކީ ދޫ ދިނުމަށް ހުއްޖަތެއްގެ ގޮތުގައި ވެރިން އަބަދުވެސް ގެންގުޅެމުންދާ އެއްޗެއް ކަމަށެވެ.

އެމަނިކުފާނު ވިދާޅުވީ، ފެހި ގާނޫނު އަސާސީ ބިނާވެގެން އައީ ބަރުލަމާނީ ސިފައެއްގައި ކަމަށާއި، ނަމަވެސް އެންމެ ފަހު ވަގުތު ވެރިކަމުގެ ނިޒާމާއި ގުޅޭ ގޮތުން ފެންނަ ނުފެންނަ ވޯޓެއް ނެގުމާއިއެކު އެކަން ބަދަލުވެގެން ދިޔަ ކަމަށެވެ. އެއީ 2007 ވަނަ އަހަރުއެވެ. ނަމަވެސް އެ ވޯޓުގެ ނަތީޖާ އޭރު އެމްޑީޕީން ބަލައިނުގަންނަ ކަމަށް އެމަނިކުފާނު ވިދާޅުވިއެވެ. ރައީސް ނަޝީދު ވިދާޅުވީ، އެމަނިކުފާނުގެ ވެރިކަމުގައި ގާނޫނު އަސާސީ ތަންފީޒުކުރަން އެތައް ދަތިތަކެއް ދިމާވިކަމަށެވެ.

"އެއީ މި ގާނޫނު އަސާސީއަކީ ތަބީއީ ގޮތުން ރިޔާސީ ނިޒާމަކަށް ފައްކާވެފައި އޮތް ގާނޫނު އަސާސީއެއް ނޫން." ރައީސް ނަޝީދު ވިދާޅުވިއެވެ.

އައު ގާނޫނު އަސާސީ ތަސްދީގު ކުރައްވާފައިވަނީ 2008 ވަނަ އަހަރުގެ އޮގަސްޓު މަހުގެ ހަތް ވަނަ ދުވަހުއެވެ. ގާނޫނު އަސާސީ ތަސްދީގު ކުރައްވާފައިވަނީ ކުރީގެ ރައީސް މައުމޫން އަބްދުލްގައްޔޫމެވެ. ފެހި ގާނޫނު އަސާސީއަކީ ރާއްޖޭގެ ތާރިހުގައި އެކުލަވާލީ ހަތް ވަނަ ގާނޫނު އަސާސީއެވެ. އެއަށް ފަހު އަމަލުކުރަމުން އަންނަނީ މި ގާނޫނު އަސާސީ އަށެވެ.