ސްކޭމްތައް ހުއްޓުވަން އެންޓި ސްކޭމް ސެންޓަރުގެ ނަމުގައި އާ ސެންޓަރެއް ގާއިމުކޮށްފައިވާކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.

ފުލުހުންގެ ހިދުމަތުން މިކަން ހާމަކޮށްފައި ވަނީ ކުރިއަށް އޮތް ހަތަރު އަހަރަށް އެ މުއަސަސާއިން އެކުލަވާލާފައިވާ ސްޓްރެޓެޖިކް ޕްލޭންގެ މައުލޫމާތު ހިއްސާ ކުރަމުންނެވެ.

ފުލުހުން މިއަދު ބުނީ ސްކޭމްގެ މައްސަލަތަކަށް ހާއްސަ ސަމާލުކަމެއް ދީގެން މަސައްކަތްކުރުމަށްޓަކައި އެންޓި ސްކޭމް ސެންޓަރެއް ގާއިމްކުރެވިފައިވާ ކަމަށެވެ. މީގެ އިތުރުން ކޮމާންޑް ލެވަލްގައި ގޭންގް ކްރައިމް އެންފޯސްމަންޓް، ޑިޖިޓަލް ޓޭޑާ އެންޑް ޓެކްނޮލޮޖީ ބަހާއެއް ގާއިމްކޮށް، ޑޭޓާ ޑްރައިވަން އަދި ޒަމާނީ މުއައްސާސާއެއް ބިނާ ކުރުމަށްޓަކައި ޑިޖިޓަލް ކޮމާންޑެއް މުޅިން އަލަށް ގާއިމްކޮށްފައިވާ ކަމަށް ވެސް ފުލުހުން ބުނެފައި ވެއެވެ.

ފުލުހުން ބުނީ ހުޅުމާލޭގައި ކުރެވޭ ޕޮލިސިން އިތުރަށް ހަރުދަނާކޮށް ތަނާ އެކަށީގެންވާ ޕޮލިސިންގ ހިދުމަތެއް ދިނުމަށްޓަކައި ހުޅުމާލެ ޕޮލިސްގެ ނަމުގައި ވަކި ޕޮލިސިންގ ކޮމާންޑެއްވެސް ގާއިމްކޮށްފައިވާ ކަމަށެވެ.

ކުރިއަށް އޮތް ހަތަރު އަހަރަށް އެކުލަވާލާފައިވާ ފުލުހުންގެ ސްޓްރެޓެޖިކް ޕްލޭންގައި އަވަސް އަދި އިތުބާރު ކުރެވޭ ޚިދުމަތުގެ ނިޒާމެއް އެކަށައެޅުމަކީ މުހިންމު ދާއިރާއެއްގެ ގޮތުގައި ހިމަނާފައިވާ ކަމަށް ފުލުހުން ބުނެއެވެ.