ގައުމީ އެއާލައިން، މޯލްޑިވިއަނުން ބަނގުލަދޭޝްއަށް ކުރާ ދަތުރުތައް މެދުކަނޑާލައިފި އެވެ.

މޯލްޑިވިއަންގެ ރަސްމީ އެކައުންުޓުން އެކްސްގައި ބުނީ ބަނގުލަދޭޝްގެ ހާލަތު މިވަގުތު އޮތް ގޮތުން މިއަދުން ފެށިގެން އެ ގައުމުގެ ވެރިރަށް، ޑާކާއަށް ކުރާ ދަތުރުތައް މެދުކަނޑާލައިފައިވާ ކަމަށެވެ.

މޯލްޑިވިއަނުން އިތުރަށް ބުނީ އެންމެ ބޮޑަށް އިސްކަން ދެނީ ފަސެންޖަރުންނާއި ކްރޫއިންނަށް ކަމަށާއި އަދި ބަނގުލަދޭޝްގެ ހާލަތު ވަރަށް ގާތުން ބަލަމުންދާ ކަމަށެވެ.

ނަމަވެސް ދެން ހިދުމަތް ފަށާނެ ދުވަހެއް އެ އެއާލައިނުން ހާމައެއް ނުކުރެއެވެ.

ބަންގުލަދޭޝްގައި މުޒާހަރާތައް ފެށުނީ އެ ގައުމުގެ މިނިވަންކަމަށް މަސައްކަތް ކުރި މީހުންގެ ދަރިންނަށް ސިވިސް ސާވިސްގެ ވަޒީފާތަކެއް ހާއްސަ ކުރުމުން ނެވެ.

އެކަމާ ގުޅިގެން ގިނަ ބަޔަކު މުޒާހަރާއަށް ނުކުތުމުން އެ ގައުމުގެ ސަލާމަތީ ބާރުތަކުން ބަޑި ޖެހުމުން އެތައް ބަޔަކު މަރުވި އެވެ. އޭގެ ފަހުން ސަރުކާރުގެ ނިންމުން ބަދަލުކުރުމުން ވެސް މުޒާހަރާތައް ނުހުއްޓުނެވެ.

މުޒާހަރާތައް ކޮންޓްރޯލް ނުވުނުން އިއްޔެ ވަނީ ބަނގުލަދޭޝްގެ ބޮޑުވަޒީރު ޝައިހު ހަސީނާ އިސްތިއުފާ ދެއްވައިފަ އެވެ.