ތިލަފުށީގެ ވޯކްޝޮޕެއްގައި މިއަދު ހެނދުނު ރޯވި އަލިފާންގަނޑު ނިއްވާލައިފި އެވެ.

ތިލަފުށީގައި ހުންނަ މެރިންޑޯ ވޯކްޝޮޕްގައި މިއަދު އަލިފާން ރޯވީ ހެނދުނު 08:30 ކަންހާއިރު އެވެ.

އެމްއެންޑީއެފުން ބުނީ އެ ހާދިސާގެ މައުލޫމާތު ފަޔަރ އެންޑް ރެސްކިޔު ސަރވިސްއަށް ލިބުމާއެކު، އެމްއެންޑީއެފް މާލޭ އޭރިއާ ކޮމާންޑް، ތިލަފުށީ ފަޔަރ ސްޓޭޝަނުގެ ފަޔަރ ފައިޓަރުން އެ ސަރަހައްދަށް ގޮސް އަލިފާން ނިންވުމުގެ މަސައްކަތް ފެށި ކަމަށެވެ.



އެމްއެންޑީއެފުން ބުނީ އަލިފާންގަނޑު ކޮންޓްރޯލްކުރެވުނީ މިއަދު 09:46 ހާއިރު ކަމަށާއި އަދި އަލިފާން އެއްކޮށް ނިއްވާލެވިފައިވަނީ މިއަދު 11:04 ހާއިރު ކަމަށެވެ.

އެ ހާދިސާގައި މެރީންޑޯ ވޯކްޝޮޕާ އިންވެގެންހުރި ގުދަންތަކަށް އަލިފާނުގައި ބޮޑެތި ގެއްލުންތަކެއް ލިބިފައިވާ ކަމަށް ވެސް އެމްއެންޑީއެފުން ބުނެއެވެ. ނަމަވެސް އޭގެ ތަފްސީލެއް ނުދެއެވެ.

އަދި ދިިވެއްސަކަށް ދުމުގެ އަސަރުކޮށް ކޮންމެވެސް ވަރަކަށް ފިހިގެން އައިޖީއެމްއެޗަށް ވެސް ގެންދިޔަ އެވެ. ނަމަވެސް ފަހުން އޭނާ ދޫކޮށްލައިފައިވާ ކަަމަށް އެމްއެންޑީއެފުން ބުނެއެވެ.