ރާއްޖެއަށް އެންމެ ގިނައިން ފަތުރުވެރިން އަންނަ ޗައިނާއިން އައި ފަތުރުވެރިންގެ އަދަދު ދެ ލައްކައާ ކައިރިކޮށްފިއެވެ.

މި އަހަރު ފެށުނު ފަހުން ރާއްޖެއަށް އެންމެ ގިނައިން ފަތުރުވެރިން އައި ގައުމަކީ ޗައިނާ ކަމަށް ވާއިރު އެގައުމުން މި އަހަރުގެ އޮގަސްޓް މަހުގެ ނިޔަލަށް 194،161 ފަތުރުވެެރިން އައިސްފައި ވެއެވެ.

ތަފާހިސާބުތައް ދައްކާގޮތުން އެ ލިސްޓުގެ ދެވަނައިގައި އޮތް ރަޝިޔާއިން 144،076 ފަތުރުވެރިން ވަނީ އައިސްފައެވެ. އަދި އެ ލިސްޓުގެ ތިންވަނައިގައި އޮތް އިނގިރޭސިވިލާތުން 115،786 ފަތުރުވެރިން އައިސްފައިވާއިރު، ހަތަރުވަނައިގައި އޮތް އިޓަލީން ރާއްޖެއަށް ޒިޔާރަތްކޮށްފައިވަނީ 99،513 ފަތުރުވެރިންނެވެ.

މި ތަފާހިސާބުތައް ދައްކާގޮތުން މި މަހުގެ މިހާތަނަށް ރާއްޖެއަށް 152،338 ފަތުރުވެރިން އައިސްފައިވާއިރު، މިއީ މިދިޔަ އަހަރުގެ އޮގަސްޓް މަހާއި އަޅައި ކިޔާއިރު 14 އިންސައްތައިގެ ކުރިއެެރުމެކެވެ.

ތަފާސްހިސާބުތައް ދައްކާގޮތުން މި އަހަރުގެ މިހާތަނަށް ރާއްޖެއަށް 1.3 މިލިއަން ފަތުރުވެރިން ވަނީ ރާއްޖެ އައިސްފައެވެ. މިދިޔަ އަހަރުގެ މި މުއްދަތުގައި ރާއްޖެއަށް އައިސްފައި ވަނީ 1.2 މިލިއަން ފަތުރުވެރިންނެވެ. ރާއްޖެ އަންނަ ފަތުރުވެރިންގެ އަދަދު ވަރަށް ބޮަޑަށް އިތުރުވެފައިވާއިރު، މިދިޔަ އަހަރަށް ވުރެ 10.5 އިންސައްތައިގެ ކުރިއެރުމެއް ވަނީ ހޯދައިފައެވެ.

ރާއްޖޭގައި މިހާރު 182 ރިސޯޓު ހިންގަމުންދާއިރު، 14 ހޮޓެލަކާއި، 879 ގެސްޓް ހައުސްގެ އިތުރުން، 153 ސަފާރީ އުޅަނދު ވެސް ދަނީ އޮޕަރޭޓު ކުރަމުންނެވެ.