ފެނަކަ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމަށް މުހައްމަދު އަބްދުލް ކަރީމް (ރުކުމާ) ހަމަޖައްސައިފިއެވެ.

ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ ކުރީގެ މެންބަރުކަންވެސް ކުރައްވާފައިވާ ރުކުމާ މީގެ ކުރިން ހުންނެވީ ވޭސްޓް މެނޭޖުމަންޓް ކޯޕަރޭޝަން (ވެމްކޯ)ގެ ޑެޕިއުޓީ މެނޭޖިން ޑިރެކްޓަރުގެ މަގާމުގައެވެ.

ވެމްކޯގެ ޑީއެމްޑީގެ މަގާމަށް ރުކުމާ އައްޔަން ކުރެއްވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވި ފަހުންނެވެ. އެކަމަކު، މިއަދު ފެނަކައިން ވަނީ ރުކުމާ އެ ކުންފުނީގެ ޑެޕިއުޓީ މެނޭޖިން ޑިރެކްޓަރުގެ މަގާމަށް އައްޔަންކުރިކަން އިއުލާންކޮށް، މަރުހަބާ ކިޔައިފައެވެ.

ފެނަކައިން ބުނީ އެ ކުންފުނީގެ މަސައްކަތުގައި ރުކުމާގެ ލީޑަޝިޕާއި ތަޖުރިބާ މުހިންމު ވާނެ ކަމަށެވެ. އެ ކުންފުނީގެ ޑީއެމްޑީގެ މަގާމަށް ރުކުމާ އައްޔަން ކުރީ ޑީއެމްޑީގެ މަގާމުގައި ހުންނެވި އިބްރާހިމް ނާއިފް އެ މަގާމުން ވަކިކޮށްފައެވެ. އަދި ނާއިފް އެމަގާމުން ވަކިކުރެއްވުމާ ގުޅިގެން ފެނަކައިން ވަނީ ނާއިފްގެ ހިދުމަތަށް ޝުކުރު އަދާކޮށްފައެވެ.

ނާއިފަކީ ރައްޔިތުންގެ މަޖިލިހުގެ ރައީސް އަދި ޕީއެންސީގެ ޗެއާމަން އަބްދުއްރަހީމް އަބްދުﷲ ގެ ވަރަށް އަރިސް ބޭފުޅެކެވެ. އަދި ނާއިފަކީ ރައީސް މުއިއްޒު ރިޔާސީ އިންތިހާބުގައި ވާދަކުރެއްވި އިރު އެމަނިކުފާނުގެ އިންތިހާބީ އެޖެންޓެވެ.