އިމިގްރޭޝަނުން "އިމިގްރޭޝަން ވޮޗް" ގެ ނަމުގައި ތަޢާރަފުކުރި ޚާއްޞަ ޕްލެޓްފޯމަށް މިހާތަނަށް 473 މައްސަލަ ރިޕޯޓުކުރެވިފައިވާކަމަށް އެ އިދާރާއިން ހާމަކޮށްފިއެވެ.

ގަވާއިދާ ޚިލާފަށް ދިވެހިރާއްޖޭގައި ދިރިއުޅޭ ބިދޭސީން ދެނެގަތުމަށް މޯލްޑިވްސް އިމިގްރޭޝަނުން ތަޢާރަފުކުރި މި ޕްލެޓްފޯމަށް އާންމުން މައްސަލަ ހުށަހެޅުމުގެ ފުރުޞަތު ހުޅުވާލާފައިވާއިރު، އެކަމަށް ފާހަގަކުރެވޭ މިންވަރެއްގެ އިޖާބައެއް ލިބެމުންދާކަން ފާހަގަކުރެވެއެވެ.

ޖުލައި 17 ވަނަ ދުވަހު ތަޢާރަފުކުރެވުނު މި ޕްލެޓްފޯމަށް މަޢުލޫމާތު ހުށަހަޅާ ފަރާތުގެ ކާކުކަން ހާމަނުކޮށްވެސް ރިޕޯޓުކުރެވޭނެއެވެ. އަދި ހުށަހެޅޭ މަޢުލޫމާތުގެ ސިއްރު ހިފެހެއްޓޭނެ ކަމަށްވެސް އިމިގްރޭޝަނުން ކަށަވަރުކޮށްދެއެވެ. މިއީ އިމިގްރޭޝަނާ ގުޅުންހުރި މައްސަލަތައް ފަސޭހަކަމާއެކު ރިޕޯޓުކުރުމަށް ޚާއްޞަކުރެވިފައިވާ ޕްލެޓްފޯމެކެވެ.

އިމިގްރޭޝަނުން ހާމަކުރާ ގޮތުގައި މި މަހުގެ 26 ވަނަ ދުވަހާ ހަމައަށް ހުށަހެޅިފައިވާ ރިޕޯޓުތަކުގެ ތެރެއިން މިހާރު ތަޙުޤީޤުކުރެވެމުންދާ މައްސަލަތަކުގެ އަދަދަކީ 369 އެވެ. އަދި ކަށަވަރުކުރުމުގެ މަރުޙަލާގައިވާ މައްސަލަތަކުގެ އަދަދު 82 އަށް އަރާކަމަށްވެސް އެ އިދާރާއިން ބަޔާންކޮށްފައިވެއެވެ.

އާންމުން ހުށަހެޅި މައްސަލަތަކުގެ ތެރޭގައި އެ އިދާރާގެ އިޚްތިޞާޞްގެ ތެރޭގައި ނުހިމެނޭ 22 ރިޕޯޓު ހިމެނޭކަމަށްވެސް އިމިގްރޭޝަނުން ފާހަގަކޮށްފައިވެއެވެ. މި ޕްލެޓްފޯމް މެދުވެރިކޮށް ގަވާއިދާ ޚިލާފަށް ދިރިއުޅޭ ބިދޭސީންގެ މައްސަލަތައް ރިޕޯޓުކުރުމުގެ އިތުރުން، ދިވެހިރާއްޖެއަށް ގަވާއިދާ ޚިލާފަށް އެތެރެވާން މަސައްކަތްކުރާ ބިދޭސީންގެ މަޢުލޫމާތުވެސް ހިއްސާކުރެވޭނެއެވެ.

މި ޕްލެޓްފޯމް މެދުވެރިކޮށް 24 ގަޑިއިރު ތެރޭގައި މަޢުލޫމާތު ހުށަހެޅުމުގެ ފުރުޞަތު ލިބިގެންދާނެކަމަށް އިމިގްރޭޝަނުން މައުލޫމާތު ދީފައިވެއެވެ.