ރަނގަޅު ފެންވަރެއްގައި ޞިއްޙީ ޚިދުމަތް ދިނުމަށް ގާނޫނަށް ގެނައި އިސްލާހު ރައީސް ޑރ. މުޙައްމަދު މުޢިއްޒު ތަސްދީގުކުރައްވައިފިއެވެ.

ޞިއްޙީ ޚިދުމަތް ދިނުމުގެ ޤާނޫނަށް ގެނައި ފުރަތަމަ އިސްލާހު މިއަދު ރައީސް ތަސްދީގުކުރައްވާފައިވާއިރު މި ބިލުން، ކުރީގެ ޤާނޫނުގައި ބަޔާންކުރާ ޞިއްޙީ ޚިދުމަތް ދިނުމުގެ ޤައުމީ ނިޒާމު ޤާއިމުކުރުމުގެ މަޤްސަދު އިތުރަށް ފުޅާކޮށްދޭނެ ކަމަށް ރައީސް އޮފީހުން ބުނެއެވެ. އަދި މި ނިޒާމުގެ ދަށުން ރާއްޖޭގައި ދިރިއުޅޭ މީހުންނަށް ޖިސްމާނީގޮތުންނާއި ނަފްސާނީގޮތުން ދުޅަހެޔޮ ޞިއްޙަތަކަށް ވާސިލުވެ ދެމިތިބުމަށް ބޭނުންވާ ޞިއްޙީ ޚިދުމަތާއި ވަސީލަތްތައް ރައްކައުތެރި ގޮތެއްގައި، އަދި އެކަށީގެންވާ ރަނގަޅު ފެންވަރެއްގައި ފޯރުކޮށްދެވޭނެ ކަމަށް ރައީސް އޮފީހުން ބުނެއެވެ.

މި ބިލުގައި ބަޔާންކޮށްފައިވާ ގޮތުން ޞިއްޙީ ޚިދުމަތް ދިނުމުގެ ޤައުމީ ނިޒާމުގެ ކަންކަން ވިލަރެސްކޮށް ހިންގާނީ މިނިސްޓަރުގެ ލަފާގެ މަތީން ޑިރެކްޓަރ ޖެނެރަލް އޮފް ހެލްތު ސަރވިސަސްއެވެ. އަދި، ޑިރެކްޓަރ ޖެނެރަލް އޮފް ހެލްތު ސަރވިސްގެ މަޤާމަށް ޢައްޔަނުކުރެވޭ މީހެއްގެ ކިބައިގައި ހުންނަންޖެހޭ ޝަރުޠުތަކާއި، އެ މަޤާމުގެ ބާރުތަކާއި މަސްއޫލިއްޔަތުތަކާއި، އެނޫންވެސް އެ މަޤާމާ ގުޅޭ އިޖުރާޢީ ކަންކަން މި ބިލުގައި ބަޔާންކޮށްފައިވެއެވެ.

ޞިއްޙީ ޚިދުމަތް ދިނުމުގެ ޤައުމީ ނިޒާމުން ފޯރުކޮށްދެވޭ ޕްރިވެންޓިވް ކެއަރގެ ޚިދުމަތުގެ ތެރޭގައި ޢާންމު ޞިއްޙީ ނިޒާމުގެ ތެރޭގައި ހިމެނޭ ޕްރައިމަރީ، ސެކަންޑަރީ އަދި ޓަރޝަރީ ފަރުވާ ހިމެނޭކަމަށާއި، އޭގެ ދަށުން ފޯރުކޮށްދެވެނޭ ޚިދުމަތްތަކާއި އެ ޚިދުމަތްތައް ފޯރުކޮށްދިނުމުގައި ބަލަންޖެހޭ އަސާސްތައް ބިލުގައި ބަޔާންކޮށްފައިވެއެވެ.

މި ނިޒާމުގެ ދަށުން އާބާދީގެ ނިސްބަތުން ކަމާބެހޭ ބައިނަލްއަޤްވާމީ މިންގަނޑުތަކަށް ފެތޭ މިންވަރަށް، ދިވެހިރާއްޖޭގެ ސިޓީތަކުގައި މިނިސްޓްރީން ޕްރިވެންޓިވް ކެއަރގެ ޚިދުމަތް ފޯރުކޮށްދެވޭނެ ފަންނީ މީހުން ހިމެނޭ ޕްރައިމަރީ ކެއަރގެ ޚިދުމަތް ދެވޭނެ މަރުކަޒުތައް ޤާއިމުކުރަންވާނެކަމަށާއި، މި ޚިދުމަތް މެދުނުކެނޑި ދެމުންގެންދާކަން ކަށަވަރުކުރެވޭނެ ގޮތްތަކާއި، ޚިދުމަތުގެ ފެންވަރާއި ރައްކައުތެރިކަން ދެމެހެއްޓުމަށް މި ނިޒާމު ހިނގާނުހިނގާ ގޮތް މޮނިޓަރކުރުމުގެ ޒިންމާ ކޮމިޝަނަރ އޮފް ކޮލިޓީ އެޝުއަރަންސަށް މި ބިލުން މަތިކޮށްފައިވެއެވެ.