ރާއްޖެއާއި ޗައިނާއާދެމެދު ދެގައުމުގެ ފައިސާއިން މުއާމަލާތުކުރަން ފެށުމުން، ފަތުރުވެރިކަމަށް ބޮޑު ކުރިއެރުމެއް އަންނާނެ ކަމަށް ފަތުރުވެރިކަމާ ބެހޭ ވަޒީރު އިބްރާހީމް ފައިސަލް ވިދާޅުވެއްޖެއެވެ.

ވަޒީރު ފައިސަލް ވިދާޅުވީ ރާއްޖެއާއި ޗައިނާއާ ދެމެދު ދެގައުމުގެ ފައިސާއިން މުއާމަލާތުކުރަން ފެށުމުން، ޗައިނާއިން ރާއްޖެ އަންނަ ފަތުރުވެރިންގެ އަދަދު އިތުރުވެ ފަތުރުވެރިކަމުން ރާއްޖެއަށް ކުރާ މަންފާ ވަރަށް ބޮޑަށް އިތުރުވެގެންދާނެކަމަށެވެ.

ދިވެހި ސަރުކާރާއި ޕީޕަލްސް ބޭންކް އޮފް ޗައިނާ (ޕީބީއޯސީ) އާއި ދެމެދު އެއްބަސްވެފައިވަނީ ކަރަންޓް އެކައުންޓް މުއާމަލާތްތައް ދެ ގައުމުގެ ފައިސާއިން ކުރެވޭނެގޮތަށް ކަމަށް ވާއިރު މި އެއްބަސްވުމުގެ އެންމެ ބޮޑު ފައިދާއަކީ ޑޮލަރަށް ބަރޯސާވުން ކުޑަވެ ދިވެހި ފައިސާގެ އަގު އުފުލުމެވެ.



ޗައިނާއާއެކު ވެފައިވާ އެއްބަސްވުމާ ގުޅޭގޮތުން ސޯޝަލް މީޑިއާގައި ކުރެއްވި ޕޯސްޓެއްގައި ފަތުރުވެރިކަމާ ބެހޭ ވަޒީރު ވިދާޅުވީ ރާއްޖެއަށް އެންމެ ގިނައިން ފަތުރުވެރިން އަންނަ ޤައުމުގެ އިތުރުން ޗައިނާއަކީ ފަތުރުވެރިކަމާ ގުޅުންހުރި ވަރަށް ގިނަ ވިޔަފާރީގެ މުއާމަލާތްތައް ދިވެހިރާއްޖެއިން ކުރާ ގައުމެއްކަމަށެވެ. ވަޒީރު ވިދާޅުވީ ވިޔަފާރިތަކަށް ބޭނުންވާ ވަރަށް ގިނަ މުދަލުގެ މުއާމަލާތްތައް ޗައިނާއިން ކުރާ ކަމަށެވެ.

ވަޒީރު ވިދާޅުވީ ރާއްޖެއާއި ޗައިނާއާ ދެމެދު ދެގައުމުގެ ފައިސާއިން މުއާމަލާތުކުރަން ފެށުމުން، ރާއްޖެ އަންނަ ފަތުރުވެރިން ކުރާ ފައިސާގެ މުއާމަލާތްތައް ފަސޭހަވެ، ރާއްޖެއަށް އަންނަ ފަތުރުވެރިންގެ އަދަދު ވަރަށް ބޮޑަށް އިތުރުވާނެކަމަށެވެ. އަދި މުޅި މި ސިނާއަތަށް ބޮޑު ކުރިއެރުމެއް ލިބޭނެކަމަށްވެސް ވަޒީރު ވިދާޅުވިއެވެ.

ޗާއިނާއަކީ ރާއްޖެއަށް އެންމެ ގިނައިން ފަތުރުވެރިން އަންނަ ގައުމަށް ވާއިރު މިއީ ހަމަ ޔަގީނުންވެސް މީގެ މަންފާ ދެގައުމަށް ކުރާނެ ކަމެއްކަން ފާހަގަ ކުރެވެއެވެ.