ޗައިނާގައި ހުރި ދުނިޔޭގެ އެންމެ ބޮޑު ބޭންކް، އިންޑަސްޓްރިއަލް ކޮމާޝަލް ބޭންކް (އައިސީބީސީ) ގޮތްޕެއް ރާއްޖޭގައި ހުޅުވަން ނިންމައިފިއެވެ.

ދުނިޔޭގެ އެންމެ ބޮޑު ބޭންކް، ޗައިނާގެ އައިސީބީސީގެ ބްރާންޗެއް ރާއްޖޭގައި ގާއިމުކުރުމުގެ މަޝްވަރާތައް ކުރިއަށްދާކަން ހާމަކުރައްވާފައި ވަނީ އިޤުތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުހައްމަދު ސައީދުއެވެ.

ދައުލަތުގެ މީޑިއާއަށް ދެއްވި އިންޓަވިއުއެއްގައި ވަޒީރު ސައިދު ވިދާޅުވީ، މިއަހަރުގެ ކުރީކޮޅު ރައީސް ޑރ. މުއިއްޒު ޗައިނާއަށް ކުރެއްވި ދަތުރުފުޅުގައި ޗައިނާގެ ރައީސް ޝީޖިންގ ޕިންގ އާއެކު ބޭއްވި މަޝްވަރާތަކުގައި އެދިވަޑައިގެންނެވި ވަރަށް ގިނަ ކަންކަން އެބަ ހުރި ކަމަށެވެ.

ވަޒީރު ވިދާޅުވީ ދެ ރައީސުންގެ މި މަޝްވަރާތަކުގެ ތެރޭގައި ރާއްޖޭގެ އިގްތިސޯދު ރަނގަޅު ކުރުމަށްޓަކައި ވަރަށްގިނަ މަސައްކަތްތަކެއް ކުރެއްވުމަށް ޗައިނާގެ ސަރުކާރުގައި އެދިވަޑައިގެންނެވިއެވެ.

ދެ ގައުމު ގުޅިގެން އިންވެސްޓްމެންޓް، ވިޔަފާރި، އަދި ވިޔަފާރި ތަރައްގީ ކުރުމުގެ ދާއިރާއިންނާއި، ޗައިނާއިން ރާއްޖެއަަށް ފަތުރުވެރިކަން އިތުރު ކުރުމަށާއި، ދަތުރުކުރާ މަންޒިލްތައްވެސް އިތުރުކޮށްދިނުމަށް މަޝްވަރާ ކުރެވުނު ކަން ފާހަގަ ކުރައްވައި ވަޒީރު ވިދާޅުވީ ޗައިނާ ސަރުކާރަށް ރައީސް ހުށަހެޅުއްވި ކަންކަމުގެ ތެރޭގައި ޗައިނާގެ ބޭންކް، އަދި ދުނިޔޭގެ އެންމެ ބޮޑު ބޭންކް، އައިސީބީސީގެ ބްރާންޗެއް ރާއްޖޭގައި ގާއިމް ކުރުން ހިމެނޭ ކަމަށް އެމަނިކުފާނު ވިދާޅުވިއެވެ.

ރާއްޖޭގެ އެންމެ މައި އިޤްތިސާދަކީ ފަތުރުވެރިކަން ކަމަށް ވީއިރު ޗައިނާ އަކީ ރާއްޖެއަށް ފަތުރުވެރިން އެންމެ ގިނައިން އަންނަ ގައުމުކަން ފާހަގަ ކުރެވެއެވެ. އަދި ޗައިނާއާ ރާއްޖެއާ ދެމެދު އަހަރަކު ގާތްގަނޑަކަށް 700 މިލިއަން އެމެރިކާ ޑޮލަރުގެ ވިޔަފާރީގެ މުއާމާލާތު ކުރެވޭކަންވެސް ފާހަގަ ކުރެވެއެވެ.