އައްޑޫގައި ހަދާ މަރުކަޒީ އިންޖީނުގޭގެ މަސައްކަތް އަދި އޮތީ ފައިނޭންސިންގެ މަރުހަލާގައި ކަމަށް އެންވަޔަރަމަންޓް މިނިސްޓަރު ތޯރިގު އިބްރާހިމް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު ތޯރިގުއާ ސުވާލުކުރުމަށް ހުޅުވާލި ފުރުސަތުގެ ތެެރެއިން މަރަދޫ ދާއިރާގެ މެމްބަރު އަހުމަދު ދީދީ ވަނީ އައްޑޫގައި ތަކުރާރުކޮށް ކަރަންޓް ކެނޑޭތީ ކަންބޮޑުވުން ފާޅުކުރައްވައިފަ އެވެ.

އެހެންވެ އެ މައްސަލައަށް ދާއިމީ ހައްލެއް ލިބިދޭނީ ކޮން އިރަކުންތޯ އޭނާ ސުވާލުކުރެއްވިއެވެ.

އެ ސުވާލަށް ޖަވާބު ދެއްވައި މިނިސްޓަރު ތޯރިގު ވިދާޅުވީ އައްޑޫ ސިޓީއަށް މިހާރު ކަރަންޓު ދެވޭ ކެޕޭސިޓީއަކީ 12.1 މެގަވޯޓް ކަމަށާއި އަދި ޕީކް ޑިމާންޑްގައި 11.2 މެގަވޯޓް ކަމަށެވެ.

އަދި މިހާރުވެސް އައްޑޫގައި ކަރަންޓް ދިނުމަށް 13 ޖެނެރޭޓަރު ބޭނުންކުރަމުންދާ ކަމަށާއި އަދި އޭގެ ތެރެއިން ދެ ޖެނެރޭޓަރު އޯވަހޯލް ކުރުމަށް ޕްރޮކިއުމަންޓް މަަސައްކަތް މިހާރުވެސް ކުރަމުންދާ ކަމަށެވެ.

އަދި 1.2 މެގަވޯޓުގެ ޖެނެރޭޓަރެއް އައްޑޫއަށް ގަތުމަށް ކުރި އިއުލާންއާ ގުޅިގެން މިއަދު ފެނަކައިގައި ބީލަން ބަލައިގަތުމުގެ މަސައްކަތް ކުރިއަށްދާނެ ކަމަށް ވެސް މިނިސްޓަރު ވިދާޅުވިއެވެ.

"އޭގެ އިތުރަށް 32 މެގަވޯޓުގެ ސެންޓްރަލް ޕަވަރ ސްޓޭޝަންގެ މަސައްކަތްވެސް އަޅުގަނޑުމެން މިދަނީ ވީހާވެސް އަވަހަކަށް ކުރެވޭތޯ. އެއީ ކުރީގައި އަންޕްލޭންކޮށް ހެދިފައި އޮތް ތަނަކަށްވާތީވެ އެތަން އިތުރަށް ޕްލޭންކުރެވިގެން ފެނަކައިން މިހާރު ވަނީ ޓެންޑަރ ކުރެވިގެން ބަޔަކާ ހަވާލުކުރެވިފަ އެ މަސައްކަތްކުރަން. އެހެން ނަމަވެސް އެއީ ވަރަށް ބޮޑު ޚަރަދެއް ހިނގާ ކަމަކަށްވާތީވެ ފިނޭންސްގެ މަސައްކަތް ހައްލުކުރުމަށް މިހާރު ކުރެވެމުން ދަނީ" މިނިސްޓަރު ވިދާޅުވިއެވެ.