މި ސަރުކާރުން މިހާތަނަށް 328 މިލިއަން ރުފިޔާގެ މަސްތުވާތަކެތި އަތުލައިގެންފައިވާ ކަމަށް ދާޚިލީ ވަޒީރު އަލީ އިޙްސާން މިއަދު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވަޒީރު އިހުސާން ވިދާޅުވީ، މިސަރުކާރުން 17 ނޮވެންބަރުގައި ރާއްޖޭގެ ހިންގުމާ ޙަވާލުވީ ފަހުން މި މަހުގެ 20 ވަނަ ދުވަހުގެ ނިޔަލަށް 328 މިލިއަނަށްވުރެ ގިނަ ރުފިޔާގެ މަސްތުވާތަކެތި ހޯދައިފައިވާކަމަށެވެ.

އޭގެ ތެރޭގައި މަސްތުވާތަކެތީގެ އެކި ބާވަތްތަކާއި ބަނގުރާވެސް ހިމެނޭ ކަމަށް އިޙްސާން މިއަދު ވިދާޅުވިއެވެ.

“މީގެން މި އަންގާދެނީ ރާއްޖޭގެ މަސްތުވާތަކެތީގެ މާޙައުލުގައި މިކަން އޮތް ވަރު. އަދި އަޅުގަނޑުމެންގެ އިންޓަރސެޕްޝަނުން މިހާރު ހިފެހެއްޓެމުންދާވަރު.” އިޙްސާން މިއަދު ވިދާޅުވިއެވެ.

މިއަދުގެ ނޫސްވެރިންގެ ބައްދަލުވުމުގައި މި މަސްތުވާތަކެތީގެ ތަފްސީލް ދެއްވަމުން ޕޮލިސް ކޮމިޝަނަރު އަލީ ޝުޖާއު ވިދާޅުވީ މިސަރުކާރުން މިހާތަނަށް 177 ކިލޯއަށްވުރެ ގިނަ މަސްތުވާތަކެތި އަތުލައިގަނެފައިވާ ކަމަށެވެ. އަދި 8،300 އަށްވުރެ ގިނަ ރަލާއި، ބަނގުރާ ފުޅިއާއި ދަޅު ހޯދައިފައިވާ ކަމަށްވެސް ޝުޖާއު ވިދާޅުވިއެވެ.

އޭގެ އިތުރުން ޝުޖާއު މިއަދު ވިދާޅުވީ މަސްތުވާތަކެއްޗާ ގުޅުންހުރި 335 މައްސަލަ ތަހުގީގުކޮށް ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވައިފައިވާ ކަމަށެވެ. އަދި މަސްތުވާތަކެތީގެ މައްސަލަތަކުގައި އުޅޭ 900އަށްވުރެ ގިނަ މީހުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށްވެސް ޝުޖާއު ވަނީ ވިދާޅުވެފައެވެ.