ރާއްޖޭގެ ބާޒާރުގައި ޑޮލަރު ލިބުން ތާށިވެ، ޑޮލަރުގެ އަގު ބޮޑުވެފައިވަނީ، ރާއްޖޭގެ ޚާރިޖީ ސިޔާސަތު ދޯހަޅި ވުމުން ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރ އާދަމް ޝަރީފް ޢުމަރު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް ނޮޅިވަރަމް ދާއިރާގެ މެމްބަރު މުޙައްމަދު ނަޝީދު ހުށަހެޅުއްވި ކުއްލި މައްސަލައިގެ ބަހުސްގައި ވާހަކަ ދައްކަވަމުން މެމްބަރު ޝަރީފް ވިދާޅުވީ ރާއްޖޭގެ މިއަދު ގެ ޚާރިޖީ ސިޔާސަތު އޮތީ އެއް ޤައުމަށް ބަރޯސާ ވެފައި ކަމަށެވެ. އޭނާ ވިދާޅުވީ، ޑޮލަރުގެ ދަތިކަން އިންތިހާއަށް ކުރިމަތިވެ، އިޤްތިޞާދު ވެއްޓިފައިވާ އަނދަވަޅުން އަރައިގަތުމަށް އޮތް ހައްލަކީ އެކުވެރި ދައުލަތްތަކުން އެހީތެރިކަން ހޯދުން ކަމަށެވެ.

"ރާއްޖޭގެ ޚާރިޖީ ސިޔާސަތު އޮތްގޮތުން އަޅުގަނޑުމެންނަށް ގިނަ ޤައުމުތަކުން އެހީތެރިކަން ލިބޭނެ ގޮތެއް މިއަދު ހަމަޖެހިފައި ނެތްކަން. ޚާރިޖީ ސިޔާސަތުގައި ހަމައެކަނި އެއް ބަޔަކަށް އަޅުގަނޑުމެން ބަރޯސާ ވުމުގެ ސަބަބުން ދުނިޔޭގެ ފައިސާ ގެންގުޅޭ ތަނަވަސް މީހުންގެ އެހީތެރިކަމެއް އަޅުގަނޑުމެނަށް ލިބޭނެ ގޮތެއް ނެތް." އާދަމް ޝަރީފް ވިދާޅުވިއެވެ.

ރާއްޖޭގައި ޑޮލަރު ލިބުން ދަތިވެ ޑޮލަރުގެ ކަޅުބާޒާރެއް އުފެދިފައިވާއިރު މިހާރު ކަޅުބާޒާރުގައި ޑޮލަރެއްގެ އަގު އުޅެނީ 20 ރުފިޔާއާއި 21 ރުފިޔާއާ ދެމެދުގައި ކަމަށް މިއަދުގެ ޖަލްސާގައި ބައެއް މެމްބަރުން ފާހަގަކުރެއްވިއެވެ. އެކަމުގެ ސަބަބުން އިންފްލޭޝަން މަތިވަމުން ދާކަމަށް އިދިކޮޅު މެމްބަރުން ވިދާޅުވެފައިވާއިރު، މިއަދުގެ ޖަލްސާގައި ބިލެއްދޫ ދާއިރާގެ މެމްބަރު އަޙްމަދު ޙަލީމް ވިދާޅުވީ ޑޮލަރުގެ ތާށިކަން އައިސްގެން އުޅެނީ ރާއްޖެއަން ޗައިނާއިން ދީފައިވާ ލޯނުތަކަށް ޑޮލަރުން ފައިސާ ދައްކަން ޖެހޭތީ ކަމަށެވެ.

ދޮންބިލެއް މިހެން ވިދާޅުވި ނަމަވެސް ޗައިނާއިން ރާއްޖެއަށް ދީފައިވާ ލޯނުތައް އަނބުރާ ދެއްކުން ކޯވިޑާ ގުޅިގެން މިހާރު ވަނީ މަޑުޖައްސާލާފައެވެ. އެކަން ދެސަރުކާރުން ވެސް ވަނީ އިޢުލާން ކޮށްފައެވެ.