ޔޫކްރޭންއާ ދެކޮޅަށް ރަޝިޔާއިން ކުރަމުންދާ ހަނގުރާމައިގައި ބައިވެރިވުމަށް އުތުރު ކޮރެއާއިން 10،000 ސިފައިން ފޮނުވި ކަމަށް އެމެރިކާގެ ޕެންޓަގަން އިން ބުނެފި އެވެ.

އެމެރިކާގެ ދިފާއީ އިދާރާ ޕެންޓަގަން އިން ތުހުމަތު ކުރާ ގޮތުގައި އުތުރު ކޮރެއާއިން ދަނީ ރަޝިޔާގެ ހަނގުރާމަ އަށް އެހީވުމަށް އެގައުމުގެ ސިފައިން ތަމްރީނު ހެދުމަށް ފޮނުވަމުންނެވެ. އަދި މިގޮތަށް ފޮނުވާ ސިފައިންގެ އަދަދު އިތުރުވުމަކީވެސް އެކަށީގެންވާ ކަމެއް ކަމަށް އެމެރިކާއިން ބުނެއެވެ.

ރަޝިޔާއިން އުތުރު ކޮރެއާގެ ސިފައިންގެ އެހީތެރިކަން މި ހަނގުރާމައިގައި ބޭނުންކުރާނަމަ ޔޫކްރޭންގެ ހަނގުރާމަ ފުޅާވެ އެގައުމަށް ލިބޭ ގެއްލުން ބޮޑުވާނެ ކަމަށް އެމެރިކާއިން ބުނެއެވެ.

ޕެންޓަގަންގެ ތަރުޖަމާނު ސަބްރީނާ ސިންގް ހޯމަ ދުވަހު ބުނީ އިރުމަތީ ރަޝިޔާއަށް ތަމްރީނު ހޯދުމަށް ފޮނުވާފައިވާ އުތުރު ކޮރެއާގެ ސިފައިންގެ އަދަދަކީ 10،000 ކަމަށެވެ. އަދި އެގައުމުން ފުރަތަމަ ލަފާކުރީ ރަޝިޔާއަށް ފޮނުވި ސިފައިންގެ އަދަދު 3،000 އަށްވުރެ މަތި ނުވާނެ ކަމަށެވެ.

ސަބްރީނާ ސިންގް ބުނީ ރަޝިޔާއަށް ފޮނުވި ސިފައިންގެ ބައެއް މިހާރު ޔޫކްރޭނާ ކައިރިއަށް ގޮސްފައިވާ ކަމަށާއި އަދި ރަޝިޔާއިން މި ސިފައިންގެ އެހީތެރިކަން ހޯދާތީ އިންތިހާއަށް ކަންބޮޑުވާކަމަށް އޭނާ ވަނީ ބުނެފައެވެ.

އެމެރިކާގެ ކަންބޮޑުވުން މިކަމުގައި ހާމަކުރި އިރު ދެކުނު ކޮރެއާއިންވެސް ވަނީ އުތުރު ކޮރެއާ އާއި ރަޝިޔާގެ މި ގުޅުން ވަރުގަދަ ވަމުންދާތީ ކަންބޮޑުވާކަމަށް ބުނެފައެވެ. އެގޮތުން ދެކުނު ކޮރެއާގެ ރައީސް ޔޫން ސުކް ޔެއޯލް ވިދާޅުވީ އުތުރު ކޮރެއާގެ އަސްކަރީ ސިފައިން ރަޝިޔާ އަށް ފޮނުވުމަކީ ދެކުނު ކޮރެއާގެ ގައުމީ ސަލާމަތަށް ވެސް އަދި ބައިނަލްއަގްވާމީ މުޖުތަމައަށް ވެސް ނުރައްކާވާ ކަމެއް ކަމަށެވެ.