ޙައްޖާއި ޢުމްރާގެ ޚިދުމަތުގައި ވިޔަފާރިއަށް ވުރެ ދަރުމަ އިސްކުރަން ނާއިބު ރައީސް ޙުސައިން މުޙައްމަދު ލަޠީފް ގޮވާލައްވައިފިއެވެ.

ރާއްޖޭގެ ފުރަތަމަ ޙައްޖު ޢުމްރާ ކޮންފަރަންސް އިފްތިތާހުކުރުމަށް މިއަދު ބޭއްވި ރަސްމިއްޔާތުގައި ނާއިބު ރައީސް ވިދާޅުވީ ރާއްޖޭގައި އެފަދަ ކޮންފަރަންސެއް ބޭއްވޭކަމީ އެމަސައްކަތް ހަރުދަނާކުރުމަށް ސަރުކާރުން ކުރައްވާ މަސައްކަތުގެ އަލިގަދަ ހެތްކެއްކަމަށެވެ.

ހަމަ އެހެންމެ ޙައްޖާއި ޢުމްރާއާ ގުޅިފައިވާ އިންތިޒާމުތައް ހަމަޖައްސައި ވީހާވެސް ލުއިފަސޭހަކޮށް، ފެންވަރު ރަނގަޅު ޚިދުމަތްތައް ފަހިކޮށްދެއްވުމަށް ވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަސައްކަތް ކުރައްވަމުން ގެންދަވާކަން ނާއިބު ރައީސް ފާހަގަކުރެއްވިއެވެ.

ނާއިބު ރައީސް އިތުރަށް ވިދާޅުވީ އެ ކޮންފަރަންސްގެ ނިންމުންތަކުގެ އަލީގައި، ޙައްޖާއި ޢުމްރާގެ ޚިދުމަތުގެ ދާއިރާ ފުޅާވެ މުޅި ނިޒާމު ފުރިހަމަވެގެންދާނޭ ކަމަށް ޔަޤީންކުރައްވާ ކަމަށެވެ.

އަދި ޙައްޖުވެރިންގެ ފައިސާއަށް ރައްކާތެރިވެ، ޙައްޖު ފަންޑު ތަރައްގީކޮށް ދިރުވުމަށް އައު ވިސްނުންތަކެއް ވިސްނައި، ޙައްޖުގެ އަގު ތިރިކުރުމަށް ސަރުކާރުން ގެންގުޅުއްވާ ސިޔާސަތު ހަގީގަތަަކަށް ވެގެންދާނެ ކަމަށް އުއްމީދުވެސް ކުރައްވާ ކަަމަށް އެމަނިކުފާނު ވިދާޅުވިއެވެ.

ނާއިބު ރައީސް ވިދާޅުވީ ޙައްޖާއި ޢުމްރާގެ ޚިދުމަތް ދޭ ކުންފުނިތަކުން އެ ޚިދުމަތް ދޭންވާނީ ވިޔަފާރިއަށް ވުރެ ބޮޑަށް އެކަމުން ލިބޭ ދަރުމަ އާއި ސަވާބު އިސްކޮށްގެން ކަމަށެވެ.