ރާއްޖޭގައި ފަތުރުވެރިކަމުގެ ދާއިރާ އިން ނަގަމުން އަންނަ ޓީޖީއެސްޓީ 17 އިންސައްތަ އަށް ބޮޑުކުރަން ރައްޔިތުންގެ މަޖިލީހުން މިއަދު ފާސްކޮށްފިއެވެ.

ފަތުރުވެރިކަމުގެ ދާއިރާއިން ނަގަމުން އަންނަ ޓީޖީއެސްޓީ ބޮޑުކުރަން މި ސަރުކާރުން ރައްޔިތުންގެ މަޖިލިހަށް ހުށަހެޅުއްވީ މަޖިލީހުގެ މާފަންނު ހުޅަނގު ދާއިރާގެ ޕީއެންސީގެ މެމްބަރު މުހައްމަދު މުސްތަފާއެވެ. އެ ބިލް މަޖިލީހުގެ މާލިއްޔަތު އަދި އިގްތިސާދީ ކޮމިޓީގެ ޖޮއިންޓް ކޮމިޓީން ދިރާސާކުރުމަށްފަހު ރިޕޯޓް ވަނީ މުޅި މަޖިލީހުގެ އާންމު ކޮމިޓީއަށް ހުށައަޅައި ފާސްކޮށްފައެވެ.

މަޖިލީހުގެ ތަޅުމަށް މި ބިލު ފާސްކުރުމަށް ހުށަހެޅުމަށް ފެންނަ ކަމަށް 70 މެންބަރުން ވޯޓު ދެއްވިއިރު ނުފެންނަ ކަމަށް އަށް މެންބަރަކު ވަނީ ވޯޓު ދެއްވާފައެވެ.

ޓީޖީއެސްޓީގެ ގޮތުގައި މިހާރު ނަގަމުން އަންނަނީ 16 އިންސައްތަ އެވެ. އިސްލާހުގައިވާ ގޮތުން އެ އަދަދު ނަގާނީ އަންނަ އަހަރު މެއި މެހުގެ ނިޔަލަށެވެ. އަދި އެ އަހަރުގެ ޖޫން މަހުން ފެށިގެން ޓީޖީއެސްޓީގެ ގޮތުގައި ނަގަން ފަށާނީ މިއަދު ފާސްކުރި މިންވަރު، 17 އިންސައްތަ އެވެ.

17 އިންސައްތައަށް ޓީޖީއެސްޓީ އިތުރު ކުރުމުން 2026 ވަނަ އަހަރަށް ދައުލަތަށް 201.9 މިލިއަން ރުފިޔާ ވަންނާނެ ކަމަށް ފިނޭންސް މިނިސްޓްރީން ލަފާކޮށްފައިވެއެވެ.